Türkiyənin tanınmış mütəxəssislərindən olan Fatih Terimin Çexiya yığmasının başına keçə biləcəyi ilə bağlı xəbərlər yenidən aktuallaşıb. Çexiya bir neçə gün öncə DÇ-2026-nın seçmə mərhələsi çərçivəsində Farer Adalarına uduzduqdan sonra baş məşqçi İvan Haşek ilə yollarını ayırdı. Çexlər hazırda qrupda 2-ci pillədə qərarlaşsalar da, Farer Adalarını cəmi 1 xal qabaqlayırlar. Çexiya Futbol Federasiyası baş məşqçi axtarışlarını tamamilə baş menecer Pavel Nedvedə həvalə edib. Nedved iyundan etibarən bu vəzifəni icra edir. Federasiya yeni məşqçi ilə uzunmüddətli planlar qurmaq və 2030-cu ilə qədər müqavilə imzalamaq istəyir. Terimin bu yığmanın başına keçə biləcəyi haqda xəbərlər ilk dəfə hələ ötən ay peyda olmuşdu. Çexiya mətbuatının yazdığına inansaq, Terim hazırda bu komandanın başına keçməyə 3 əsas namizəddən biridi. Digərləri Plzen ''Viktoriya''sının çalışdırıcısı Miroslav Kubek və ''Yablonets''in çalışdırıcısı Lubos Kozeldi. Terimin əcnəbi olması onun təyinatını bir qədər qəlizləşdirir. Çünki çexlər mühafizəkardı və bu ölkənin yığmasında indiyə qədər əcnəbi məşqçi işləməyib. Bu məqam hazırda Çexiya futbol ictimaiyyətində ciddi müzakirə olunur. Bir çoxlarının fikrincə, Portuqaliya, İngiltərə, Braziliya kimi yığmaları əcnəbi məşqçilər çalışdırırsa, Çexiya yığması da artıq bu yola qədəm qoymalıdı. Türkiyə mənbələri iddia edir ki, Nedved artıq Terimlə telefonla söhbət edib. Onlar bir-birini həm də bundan əvvəlki iş yerlərindən - ''Əl-Şabab''dan gözəl tanıyır. Terim bu komandada məşqçi, Nedved isə idman direktoru kimi çalışırdı. Hələlik sorğularda əsas favorit Miroslav Kubekdi.