Futbol üzrə ölkə çempionatının 1-ci liqasında çıxış edən komandalarının azarkeş qıtlığından əziyyət çəkdiyi bəllidi. Ən iddialı klublar belə bu problemə “əsir düşüb”.

“Football-plus.az” xəbər verir ki, bu çempionatın iştirakçılarından olan “Şəfa” stadiona daha çox futbolsevərin gəlməsini təmin etmək üçün diqqətçəkən aksiyaya start verib. Belə ki, paytaxt təmsilçisi sentyabrın 22-dən etibarən ev oyunlarını izləmək məqsədilə Binə qəsəbə stadionunun tribunalarına təşrif buyuran şəxslərə ABŞ-nin məşhur fəstfud şəbəkəsi olan “McDonald's”dan Kombo Menyu vəd edir. Hələ bu harasıdı?! Klub hər ev oyununda random seçimlə 3 nəfərə “MyGroup Holding”ə daxil olan “MyX” brendindən mini soyuducu, qol saatı və simsiz qulaqcıq bağışlayır. Təbii ki, “Şəfa”nın bunun müqabilində şərtləri də var. Azarkeşlər stadiona gələndə foto və videolarını sosial şəbəkə hesablarının hekayə bölümündə paylaşmalı və klubu qeyd etməlidilər. Hədiyyələr qaliblərə növbəti ev oyunlarında verilir.

Əlbəttə, belə addım təqdirəlayiqdi. Bəs effektivdimi?

“Football-plus.az” xəbər verir ki, “Şəfa” bu aksiyaya start verəndən sonra iki ev oyunu keçirib. Bakılıların 3-cü turda “Cəbrayıl”a qarşı matçını (3:0) 200, 4-cü turda MOİK-lə oyununu (4:1) isə 150 tamaşaçı tribunalardan izləyib.

Maraq üçün qeyd edək ki, paytaxt təmsilçisinin 1-ci turda evdə “Şimal”la qarşılaşdığı görüşdə stadionda 150 azarkeş olub. Bu o deməkdi ki, aksiya hələ gözləntiləri qarşılamayıb. Necə deyərlər, zorla sevgi olmur ki...

KƏNAN BAHADIR