“Düzünü desəm, “Qalatasaray”ın bu yay Osimheni daimi əsasda transfer edəcəyini düşünmürdüm. Daha öncə “Əl-Hilal”da da forma geydiyimdən onlarla əlaqələrim var idi. Məndən fikrimi soruşanda onlara düşünmədən Osimheni transfer etməyi məsləhət görmüşdüm. Onlar da mənim məsləhətimdən sonra bəzi araşdırmalar aparmış və həqiqətən də Osimheni transfer etməyin kluba faydalı olacağını düşünmüşdülər. Ancaq sonradan vəziyyət dəyişdi. Çünki “Qalatasaray”ın ciddi şəkildə Osimheni heyətdə saxlamaqda qərarlı olduğunu gördüm. Nəticə etibarilə mən menecer deyiləm. “Əl-Hilal”a, sadəcə, öz fikrimi bildirmişdim. “Qalatasaray”la da çox yaxşı münasibətlərim var. Ona görə də onların Viktoru saxlamaq istədiklərini görən kimi bu məsələdən çəkildim. İkardi məndə daha uzun müddət “Qalatasaray”da oynadı. Mənim dönəmim bir qədər qısa çəkmişdi. Müxtəlif səbəblər üzündən Türkiyədən ayrılaraq Səudiyyə Ərəbistanına yollanmışdım. Mauro ardıcıl üç il oynadı və çempionluqlar qazandı. “Qalatasaray” kimi klubda oynamaq şansı qazanmaq mənim üçün unudulmazdı. Mən əslində Türkiyəyə daha əvvəl gələ bilərdim. 2009-da “Fənərbaxça” ilə apardığım danışıqlar uğursuz alınmışdı. 2012-də “Qalatasaray” mənə yox, Qoran Pandevə üstünlük vermişdi. Bundan başqa, Uqo Almeydanın ayrıldığı mövsümdə “Beşiktaş”la da danışıqlar aparmışdım. Amma transfer alınmamışdı. Kərəm Aktürkoğlunun “Fənərbaxça”ya keçəndən sonra söylədiyi bəzi fikirlərlə razı deyiləm. Fransızlarda “səni bəsləyən əli heç vaxt vurma” kimi bir misal var. Bəzi futbolçular aşağı liqalarda oynaya-oynaya böyük klublara transfer olunur və bunun sayəsində göz önündə olmağa başlayır. Kərəmin inkişafında, bu səviyyəyə çatmasında Fatih Terimlə Okan Burukun böyük rolu var. Məncə, bu transfer zamanı daha fərqli açıqlama verə bilərdi. “Ayntraxt”a məğlubiyyətdən sonra Okan Buruk çox tənqid olundu. Bunların çoxu yersiz idi. “Liverpul” üzərində qələbədən sonra isə onu az qala dünyanın ən yaxşı məşqçisi elan etdilər. Məncə, Türkiyə futbolu naminə belə məsələlərdə fanatlar balans qurmağı bacarmalıdı”.