İspaniyalı əfsanədən ''Barselona'' və Mourinyo etirafı
Yaxın keçmişin önəmli forvardlarından olan, İspaniya futbolunda iz buraxan, 2008-12-ci illərdə ardıcıl 3 nəhəng turnirin qalibi olan İspaniyanın vazkeçilməz isimlərindən olan David Vilya ''Barselona''da oynadığı dönəmlə bağlı maraqlı etiraflar edib.
"Football-plus.az" xəbər verir ki, hazırda 43 yaşı olan Vilyanın ulduzu 2005-10-cu illərdə şərəfini qoruduğu ''Valensiya''da parlamış, 2010-da isə ''Barselona''ya transfer olunmuşdu.
Bu klubda çıxış etdiyi 3 il ərzində 119 rəsmi oyunda 48 qol, 24 məhsuldar ötürməlik performans sərgiləyən və 8 titul qazanan Vilya həmin illərdə ''Real''ı çalışdıran Joze Mourinyonu da xatırlayıb:
"Xosep Qvardiola transfer üçün mənə ilk dəfə zəng vuranda bunun bir zarafat olduğunu düşündüm və ona işlərimin olduğunu dedim. Sonra Xaviyə zəng vurdum və bu durumun ciddi olub-olmadığını soruşdum. Xavi hər şeyin ciddi olduğunu dedikdən sonra özüm yenidən Qvardiolaya zəng vurdum. Onunla ilk söhbətimizdə əsasən taktiki məsələlər haqda danışdıq. Məni nə üçün transfer etmək istədiyini, komandada mənim üçün düşündüyü rolu və ''Barsa''ya ən tez necə uyğunlaşa biləcəyimi müzakirə etdik. Bu söhbətimizdən sonra bu transferlə bağlı məndə heç bir şübhə qalmadı. Menecerimdən yalnız ''Barselona''nın təklifinə yönəlməsini tələb etdim. ''Barsa'' mənim üçün 40 milyon avro ödədikdən sonra Joze Mourinyo bir açıqlama verdi. ''Barselona''nın qol vura bilməyən bir hücumçu üçün milyonlar ödədiyini dedi. Onun bu sözlərini çox sevdim. Bu sözləri məni sanki atəşlədi. İlk ''El Klasiko''da ''Real''ı 5:0 məğlub etdik və mən 2 qol vurdum''.
Digər xəbərlər
