Aquero Qvardiola ilə yola getmirmiş
Ötən yay ''Barselona''ya transfer olunduqdan sonra ürəyindəki problemlər üzündən karyerasını erkən bitirmək məcburiyyətində qalan ''Mançester Siti''nin əfsanəsi Serxio Aquero İngiltərə mətbuatına açıqlamasında Xosep Qvardiola ilə bağlı maraqlı etiraflar edib.
Sabiq argentinalı ulduz məşqçinin ''şəhərlilər'in başına keçdiyi ilk aylarda onunla problem yaşadığını deyib:
''Qvardiola yeni baş məşqçi təyin olunduqdan sonra mənim məşq performansımı bəyənmədi. Bir dəfə mənə ''bu cür məşq etməyə ixtiyarın yoxdu'' dedi. Mən də ''bu cür, öz bildiyim kimi məşq edirəm. Sən mənə irəli qaçmağı və ordan fırlanıb geri qaçmağı tapşırsan, mən irəli qaçacam və özüm bildiyim kimi qayıdacam'' şəklində cavab verdim. Bu cür məsələlər üzündən aramızda problemlər yaranırdı. Bu da Qvardiolanın xoşuna gəlmirdi. Bu üzdən onun dönəmində ilk vaxtlarda tez-tez ehtiyatda qalırdım və mənə az şans verirdi''.
Aqueronun 2011-21-ci illərdə ''Mançester Siti''də 390 rəsmi oyunda 260 qol, 73 məhsuldar ötürmə ilə yadda qaldığını bildirək.
