“Barselona”dan öncə mənə “Real”dan çox ciddi və sərfəli təklif gəlmişdi. Bu, “kart-blanş” idi. Onlar mənə istədiyim hər şeyi verməyə hazır idilər. Hətta “Real”a getsəydim, “Barsa”dakından 3 qat artıq pul qazanacaqdım. Florentino Peres hər zaman mənə dəyər verib. Ancaq həm Ronaldinyonun vaxtilə “Barsa”da oynamasına, həm də Messi ilə bir klubda oynamaq istədiyimə görə Kataloniyaya yollandım. Bundan başqa, Qvardiolaya görə “Bavariya”ya da yollanmağın biraddımlığındaydım. Həmin vaxt Sürixdə idim. İlin qolu nominasiyasında qalib gəlmişdim. Birdən qapı döyüldü. Əynimi geyinib qapını açdım və atamla Qvardiola otağa daxil oldu. Xosep məni yeni çalışdıracağı kluba dəvət etdi. Öz ideyalarını anlatmaq üçün noutbuk və kağız da gətirmişdi. Mənə dedi ki, onun başçılığı altında bir mövsümə 60 qol vurmasam, klubunu dəyişəcək. Düzdü, söhbətin hansı klubdan getdiyini demək istəmirdi. Mənim inadkarlığımdan sonra “Bavariya”nın adını çəkdi. Sonra “bilirəm, orda hava daha soyuqdu. Münhen Barselona və ya Madrid deyil. Amma sənin qeydinə qalacam və səni dünyanın ən yaxşısı edəcəm” dedi. Ciddi şəkildə bu variant üzərində düşünsəm də, sonda yenə də “Barselona”ya üstünlük verdim. PSJ-də bir dəfə məşqdə penaltilər üzərində çalışırdıq. Messi məndən “sən axı bu cür necə vura bilirsən” deyə soruşdu (sona qədər qapıçıya baxa-baxa vurmağı nəzərdə tutur – red.). Mən də ona gülümsəyərək “sən dəlisən? Sən axı Messisən, mən vura bilirəmsə, sən də vura bilərsən, sadəcə, bunun üzərində çoxlu məşq et” dedim. O da gülümsədi və bu cür zərbənin üzərində çalışacağını dedi. DÇ-2022-də bu cür tərzdə yerinə yetirdiyi penaltilərin hamısını qola çevirdi. Bu cür tərzdə vurmadığı yeganə penaltini isə boşa verdi. “Santos”a qayıdandan sonra ilk qolumu künc zərbəsindən vurdum. Sizi əmin edirəm ki, o zərbəni bilərəkdən o cür vurdum. Künc zərbəsindən öncə düşündüm ki, rəqib azarkeşlərin gözü önündə belə qol vurmaq əla olardı. Qoldan sonra üzümü onlara tutaraq “indi nə sözünüz var?” dedim”.