“Milan”, “Yuventus” və İtaliya yığmasının sabiq üzvü Andrea Pirlo 2017-ci ildə başa vurduğu karyerasına aid maraqlı etiraflar edib.

Ötən mövsüm Türkiyədə işləyən, hazırda isə B seriyası təmsilçisi “Sampdoriya”nı çalışdıran 44 yaşlı Pirlo bir dönəm İspaniya nəhəngləri “Real” və “Barselona”ya keçməyə yaxın imiş: “2006-cı ildə mundial yeni başa çatmışdı və “Kalçopoli” qalmaqalına görə “Milan”ın aşağı liqaya göndərilməsi gündəmdə idi. Həmin vaxt Fabio Kapello yenicə “Real”ın başına keçmişdi. Mən əvvəlcə onunla, sonra da “Real” rəhbərliyi ilə danışdım. Hətta aramızda razılıq da əldə olundu. Sonra “Milan”ın mövsümöncəsi hazırlıq dönəmi başladı. Bizə dedilər ki, komanda A seriyasında qalacaq. Amma hesabımızdan xallar silinəcək. Hələ də elitada qalıb-qalmayacağımıza əmin deyildim. Ona görə də Madridə yollanmaq qərarına gəldim. Amma “Milan”ın bazasına qayıdandan sonra ilk növbədə Andrea Qalliani ilə görüşdüm. Menecerimlə birlikdə “Milan”da qalmağa qərar verdik. Qalliani masanın üzərinə müqaviləni qoydu və “istədiyin rəqəmi yaz” dedi. Bir neçə gündən sonra həmin müqaviləyə imza atdım. 2010-cu ildə isə “Barselona”ya keçidin biraddımlığındaydım. Həmin vaxt “Milan”ın Zlatan İbrahimoviçi transfer etmək şansı yaranmışdı. İbra hələ “Barselona”dan tam ayrılmamışdı. Xosep Qvardiola ondan mənim “Barsa”ya keçmək istəyib-istəməməyimlə maraqlanmağımı xahiş etdi. Sonra Qvaridolanın özü ilə təmas qurdum. Hətta ofisində onunla görüşüm də oldu. Bir müddət sonra İbrahimoviçin “Milan”a transferi rəsmiləşdi. Ona görə mən də “Milan”da qalası oldum. Qvaridola ciddi şəkildə məni komandasında görmək istədiyini dedi. Məni hələ “Breşiya”da oynadığım dönəmdən yaxşı tanıyırdı. Baxmayaraq ki, biz “Breşiya”da birlikdə oynamamışdıq. Onun ofisində oturub “Barselona”ya mümkün transferimi müzakirə etməyimlə çox fəxr edirdim. Hərçənd bu transfer sonda baş tutmadı”.