Afrika zonası üzrə DÇ-2026-nın seçmə mərhələsində mübarizəni davam etdirən Nigeriya yığması ev oyunundan öncə havada qorxu dolu anlar yaşayıb.

"Football-plus.az" xəbər verir ki, bu komanda oktyabrın 10-da səfərdə Lesoto üzərində qələbə qazandı. Oktyabrın 11-də isə Nigeriya yığmasını daşıyan təyyarə Palekvane şəhərindən Uyo şəhərinə yollanmalı idi. ''Super Qartallar'' oktyabrın 14-də Benini məhz Uyoda qəbul edəcəklər. Amma təyyarənin havada olarkən gözlənilmədən ön şüşələrindən birinin qırılması üzündən futbolçular və yığma rəsmiləri ciddi təşviş yaşadılar.

Pilot təcili olaraq təyyarəni Anqolanın Luanda şəhərindəkı hava limanına endirməli oldu. Ancaq xoşbəxtlikdən bu hadisədə ciddi xəsarət alan olmadı.

Qeyd edək ki, təyyarədə ''Qalatasaray''ın ulduzu Viktor Osimhen ilə ''Beşiktaş''lı Uilfrid Ndidi də var idi. Nigeriya Futbol Federasiyasından verilən açıqlamada qeyd olunub ki, komandanın üzvləri və rəsmiləri başqa bir təyyarəyə yerləşdirildikdən sonra uçuş davam etdirilib. Komanda salamat şəkildə Uyo şəhərinə çatıb.

Maraqlıdı ki, ''Beşiktaş'' rəsmi saytında Ndidi və Nigeriya yığması üçün ''keçmiş olsun'' mesajı yayınladığı halda ''Qalatasaray'' Osimhen üçün bu addımı atmayıb.