Yığmaya ilk dəfə çağrıldı, şoka düşdü
Karlo Ançelotti Con Viktoru yaxşı mənada şoka salıb.
"Football-plus.az" xəbər verir ki, Braziliya yığmasının baş məşqçisi “Fənərbaxça”nın zədələnən qapıçısı Edersonun yerinə komandaya onu dəvət edib.
Koreya və Yaponiya ilə yoldaşlıq oyunları üçün açıqlanan heyətə Edersonun əvəzinə “Nottingem Forest”in qapıçısı cəlb olunub. Bu, 29 yaşlı “əlcək sahibi” üçün milli komandaya ilk dəvətdi. Con ESPN-ə verdiyi açıqlamada bu xəbəri alarkən əvvəlcə inana bilmədiyini və bir dələduzluqla qarşılaşdığını düşündüyünü deyib:
“Bu, mənim üçün unikal və möhtəşəm bir hiss idi. Oyuna gedirdim və xəbəri avtobusda aldım. Şoka düşdüm. Zarafat olduğunu zənn etdim. Pasportumu istədilər və həmin an düşündüm ki, görəsən, bu, bir dələduzluqdu, yoxsa nədi?”
Ölkəsinin əsas komandaya çağrılmasını hələ də tam anlaya bilmədiyini deyən futbolçu hisslərini belə ifadə edib: “Hələ də tam dərk edə bilmirəm. Dünən bura gəldim. Çağrıldığım gündən bəri yaşadıqlarımı, karyeram boyunca başverənləri, “Botafoqo”da çıxış edərkən bu anı xəyal etdiyim vaxtları xatırlayıram. İndi milli komandada olduğuma görə çox sevinirəm, çox minnətdaram. Tanrıya sonsuz şükür edirəm”.
Digər xəbərlər
