''Fənərbaxça''nın ulduzu Con Duran meydandan kənar problemi ilə gündəmə gəlib.

Türkiyənin ''Təqvim'' nəşrinin yazdığı xəbərə inansaq, kolumbiyalı hücumçu ev sahibi ilə yaşadığı anlaşmazlıq üzündən kirayə yaşadığı evdən çıxarılıb!

Ancaq iddiaya görə bu olayın arxa planında ''Fənərbaxça''nın sabiq yönəticisi dayanıb. Belə ki, anlaşmazlıq əslində Əli Koç dönəmində klubda çalışmış həmin yönətici ilə ev sahibi arasında yaşanır. Duran isə sadəcə bu problemin qurbanına çevrilib. Onun evdə yaşadığı müddətlə bağlı detallar və aylıq ödədiyi kirayə məbləği barədə məlumat verilmir. Ancaq bu cür tanınmış futbolçunun yaşadığı evdən çıxarılması istər-istəməz Türkiyə futbolunda gündəm olub. Hələ ki, klubdan və ya futbolçunun təmsilçisindən məsələ ilə bağlı heç bir açıqlama verilməyib.

Bu yay ''Fənər''in ən önəmli transferlərindən biri olan Duran hazırda zədəlidi. Ən son avqustun 27-də ''Benfika'' ilə cavab oyununda meydana çıxan Duran o vaxtdan bu yana baş tutan 6 rəsmi matçın heç birində İstanbul nəhənginə yardım edə bilməyib.

Artıq məşqlərə başlamasına baxmayaraq onun sabah Avropa Liqasında liqa mərhələsinin 2-ci turu çərçivəsində baş tutacaq ''Nitsa'' ilə görüşü də buraxacağı gözlənilir. Duranın həftəsonu ''Samsunspor''la matçda oynamaq ehtimalı var.