''Fənərbaxça'' bu yayın önəmli transferlərindən birini tamamlamaq üzrədi. Daha öncə kolumbiyalı forvard Con Duranla anlaşma əldə edən İstanbul nəhəngi futbolçunun klubu, yəni ''Əl-Nəssr''lə də bütün məsələlərdə anlaşıb. Birillik icarənin maddi detalları tam olaraq bilinməsə də, Türkiyə mətbuatının yazdığına inansaq, ''Fənər'' Duranın illik 10 milyon avroya bərabər olan maaşını ödəmək öhdəliyini üzərinə götürüb.

"Football-plus.az" xəbər verir ki, istedadlı futbolçu gün ərzində İstanbula gələcək. ''Fənər'' tərəfindən göndərilən xüsusi təyyarə artıq Kolumbiyaya çatıb və futbolçu, eləcə də idman direktoru Devin Özəklə birlikdə İstanbula yola düşüb. Rəhbərlik artıq Duranın qalacağı evi də müəyyənləşdirib və həmin evi ona görüntülü göstərib.

2003-cü ilin dekabrın 13-də doğulan və hələ 21 yaşı olan forvard Türkiyə Futbol Federasiyasının yeni kriteriyalarına da tam uyğun gəlir. Belə ki, həmin kriteriyalara görə klublara maksimum 14 legionerlə müqavilə imzalamağa icazə verilir və onlardan 2-sinin doğum tarixi 1 yanvar 2003-cü ildən sonraya təsadüf etməlidi.

Xatırladaq ki, ulduzu ''Aston Villa''da parlayan Duran ötən mövsümün qış fasiləsində 77 milyon avro qarşılığında ''Əl-Nəssr''ə yollanaraq Kriştiano Ronaldo ilə komanda yoldaşı oldu. Amma göründüyü kimi o, cəmi 6 aydan sonra Avropaya qayıtmağa razılıq verdi. Duran ötən mövsüm ümumilikdə 47 qarşılaşmada aktivinə 24 qol yazıb.