''Fənərbaxça'' Avropa Liqasının əsas mərhələsində ilk oyununa çıxdı. Zaqrebdə ''Dinamo''nun qonağı olan İstanbul nəhəngi ümidləri doğrultmadı.

Türkiyə çempionatında olduğu kimi burda da inamsız təsir bağışlayan ''sarı-lacivərdlilər'' 1:3 hesabı ilə məğlub oldular. Komandanın yeganə qolunu Sebastyan Şimanski vurdu. ''Fənər'' Domeniko Tedeskonun başçılığı altında ilk dəfə məğlub oldu. Ümumiyyətlə, komandanın bu məşqçi ilə keçirdiyi 4 rəsmi matçda cəmi 1 qələbəsi var (2 heç-heçə, 1 məğlubiyyət). Fanatlar indidən yeni başqan Sadəttin Sarandan Əli Koçun dönəmində gətirilən Tedeskonun qovulmasını tələb edirlər.

Ötən mövsümdən fərqli olaraq Türkiyə klubları üçün bu avrokubok mövsümü heç də uğurlu başlamayıb. Ötən həftə ''Qalatasaray'' da Çempionlar Liqasının əsas mərhələsinin 1-ci turunda Frankfurtda ''Ayntraxt''dan 5 qol buraxaraq fanatlarına şok yaşatmışdı. Türkiyəni avrokuboklarda təmsil edən digər klub - ''Samsunspor'' isə gələn həftə Konfrans Liqasında mübarizəyə başlayacaq. Türkiyə klublarının bu mövsüm avrokuboklardakı göstəriciləri yumşaq desək, ürəkaçan deyil.

Qardaş ölkə təmsilçiləri keçirdikləri 20 oyundan cəmi 6 qələbə ilə ayrılıblar (4 heç-heçə, 10 məğlubiyyət)! Bu qələbələrdən 3-nü ''İstanbul BŞ'', 2-ni ''Beşiktaş'', 1-ni ''Fənərbaxça'' əldə edib.

Ən dəhşətlisi isə odu ki, Türkiyə klubları son 10 avrokubok matçının hamısında qələbəyə həsrət qalıblar (3 heç-heçə, 7 məğlubiyyət)!