Təəssüf ki, Avropada çıxışını davam etdirən Türkiyə klubları üçün bu həftə uğurlu alınmadı. Qardaş ölkənin hər üç təmsilçisi qələbəyə həsrət qaldı. Düzdü, nəzərə alaq ki, hər 3 kollektiv səfərdə oynadı və üstəlik rəqiblər də “yağlı tikə” deyildi...

"Foot“Fənərbaxça” fanatları “Sevilya” ilə oyundan öncə nostalji hisslərə qapılaraq 15 il əvvəlki dueli xatırlayırdı. Bilindiyi kimi, 2007/08-də ÇL-in 1/4 finalına yüksəlməklə bu turnridəki ən uğurlu nəticəsinə imza atan İstanbul nəhəngi 1/8 finalda məhz “Sevilya”nı mübarizədən kənarlaşdırmışdı. O vaxt evdə 3:2 hesabıyla qalib gələn və səfərdə eyni hesabla uduzan “Fənər” Volkan Dəmirəlin qəhrəmanlığı sayəsində penalti seriyasında üstün olmuşdu. Həm bu məqam, həm də əndəlüslərin çətin durumda olması “Fənər”liləri ümidləndirirdi. “Sevilya” son 3 rəsmi oyunda məğlub olmuşdu və Xorxe Sampaoli istefa təhlükəsi ilə üz-üzə idi. İspaniya polisinin türkiyəli futbolsevərlərə qarşı hədsiz kobudluğu diqqətdən qaçmadı. Düzdü, oyun fanatlar arasında yaşana biləcək çaxnaşma üzündən İspaniya hökuməti tərəfindən yüksək riskli qarşılaşma elan olunmuşdu. Amma “Fənər”lilər faktiki heç bir pis davranışa yol vermədikləri halda polislərin hədsiz aqressivliyi ilə üzləşdilər. Tribunada polislər tərəfindən döyülən və xəsarət alanlar oldu. Oyuna gəlincə, ilk hissə qonaqların üstünlüyü şəraitində keçdi. “Fənərbaxça” özünü evdəki kimi hiss edir və rəqib müdafiəsini daim təzyiq altında saxlayırdı. Amma Fərdi, Valensiya və Kinq ələ düşən fürsətləri boşa verməklə komandanın işini çətinə saldı. İkinci hissədə meydan sahibləri fəallaşdılar. Bu matçda iki komanda arasında əsas fərq qol fürsətlərindən yararlanmaqda oldu. “Fənər”dən fərqli “Sevilya” təcrübəsini ortaya qoydu və üstün oynadığı anlarda qol vurmağı bacardı. Fasilədən sonra meydana çıxan Xordanın 56-cı dəqiqədə endirdiyi zərbə zamanı top yolüstü Araoya dəyərək istiqamətini dəyişdi və tora daxil oldu. “Fənər” sonrakı dəqiqələrdə üç dəfə bərabərlik qolunu vurmağa yaxın oldu. Amma Araoya qeyri-dəqiqlik mane oldusa, Valensiyanın hər iki təhlükəli zərbəsinin qarşısını qapıçı Dmitroviç kəsdi. Sona yaxın nəticə ilə barışıb geri çəkilən “Fənər” ikinci qolu buraxmaqla vəziyyətini bir xeyli qəlizləşdirdi. Süni oyundankənar vəziyyət yaratmaq istəyi qonaqlara baha başa gəldi və sonradan meydana çıxan daha bir futbolçu – Lamela yekun nəticəni müəyyənləşdirdi.

Digər klublara gəlincə, “Sivasspor” Florensiyada yaxşı müdafiə olunsa da, qolsuz bərabərliyi sona qədər qoruya bilmədi. “İstanbul BŞ” isə bizə yaxşı tanış olan “Gelamko Arena”da hesabı açsa da, bərabərliklə kifayətləndi. Bundan əvvəlki mərhələdə “Qarabağ”a qənim kəsilən 20 yaşlı nigeriyalı forvard Gift Orban istanbulluların da qələbəsinə mane oldu. UEFA-nın əmsallar cədvəlində 12-ci pillədə qərarlaşan Türkiyə həftəni cəmi 1 heç-heçə ilə, yəni 0,200 xalla tamamlayaraq xalını 31,700-ə yüksəltdi. Artıq təmsilçisi qalmayan və 11-ci pillədə qərarlaşan Serbiyanın 32,375 xalı var.

Faktlar

* “Fənərbaxça” avrokuboklarda 253-cü oyunda 104-cü məğlubiyyətlə üzləşdi (94 qələbə, 55 heç-heçə, top fərqi – 325:367).
* “Fənərbaxça”nın avrokuboklarda tarixinin ən boyük – 10 oyunluq məğlubiyyətsiz seriyası qırıldı (7 qələbə, 3 heç-heçə)!
* “Fənərbaxça” İspaniya klublarına qarşı keçirdiyi 10-cu qarşılaşmada 9-cu dəfə uduzdu! Yeganə qələbə 2008-in fevralında ÇL-in 1/8 finalının ilk oyunu çərçivəsində məhz “Sevilya” ilə görüşdə (3:2) əldə olunub.
* “Sevilya” öz meydanında Türkiyə təmsilçilərinə qarşı keçirdiyi 6-cı oyunda da məğlub olmadı (5 qələbə, 1 heç-heçə).
* “Sivasspor” avrokuboklarda 29-cu oyunda 15-ci məğlubiyyətlə üzləşdi (10 qələbə, 4 heç-heçə, top fərqi – 33:51).
* Avropa arenasında Türkiyə və İtaliya klubları arasında 87-ci qarşılaşma baş tutdu. İtaliyalılar 49-cu qələbəyə sevindilər (20 heç-heçə, 18 məğlubiyyət).
* “İstanbul BŞ”nin 49-cu avrokubok oyununda 12-ci dəfə bərabərlik qeydə alındı (17 qələbə, 20 məğlubiyyət, top fərqi – 66:71). Əmrə Belözoğlunun başçılığı altında isə komanda 13 avrokubok matçının yalnız birində uduzub (8 qələbə, 4 heç-heçə).

ƏLİ