Sentyabrın 16-18-i aralığında Libertadores Kubokunun (LK) pley-offunda növbəti mərhələyə start verildi. Cənubi Amerikanın ən nüfuzlu klub turnirində 1/4 finalın ilk oyunları keçirildi.

Bu mərhələdə Argentinanın 4, Braziliyanın 3, Ekvadorun isə 1 komandası çıxış edir. İlk oyunlarda argentinalıların iştirakı ilə duel diqqəti cəlb etməyə bilməz. “Veles Sarsfild” evdə “Rasinq”ə minimal hesabla uduzdu. Qalan üç qarşılaşmadan ikisi isə regionun ən böyük futbol ölkələrinin təmsilçiləri arasında baş tutdu. Argentinada keçirilən və erkən final kimi dəyərləndirilən “River Pleyt” – “Palmeyras” matçı Braziliya klubunun 2:1 hesablı qələbəsi ilə nəticələndi. Ev sahibləri ilk hissəni iki top fərqi ilə üstün başa vuran qonaqların qapısına yalnız son dəqiqələrdə yol tapsalar da, məğlubiyyətdən qaça bilmədilər. Braziliyanın digər təmsilçisi “Flamenqo” evdə “Estudiantes”ə 2:1 hesabıyla qalib gəldi. İlk 9 dəqiqədə iki qol vuran meydan sahibləri 82-ci dəqiqədə Platanın növbəti xəbərdarlıq almasına görə azlıqda qaldılar. Argentina komandası bundan bir qol vurmaqla yararlanmaqla cavab oyunu ərəfəsində çox çətin görünən işini bir qədər asanlaşdırdı.

Ekvadorda keçirilən “LDU Kito” – “San Paulu” oyunu isə 2:0 hesabıyla nəticələndi. Tyaqo Nunyesin komandası inamlı qələbə ilə yarımfinala doğru real addım atdı.

1/4 final, ilk oyunlar
Veles Sarsfild (Argentina) - Rasinq (Argentina) 0:1
A.Martines, 53.
River Pleyt (Argentina) - Palmeyras (Braziliya) 1:2
Lukas Martines, 89 – Q.Qomes, 6. Roke, 41.
LDU Kito (Ekvador) - San Paulu (Braziliya) 2:0
B.Ramires, 15. Estrada, 78.
Flamenqo (Braziliya) - Estudiantes (Argentina) 2:1
Pedro, 1. Varela, 9 – Pereyra, 90+1-öz qapısına.
Cavab oyunları sentyabrın 23-25-i aralığında keçiriləcək.