Sentyabrın 24-26-sı aralığında Libertadores Kubokunun (LK) pley-offunda növbəti mərhələyə yekun vuruldu.

Cənubi Amerikanın ən nüfuzlu klub turnirində 1/4 finalın cavab oyunları keçirildi.

Xatırladaq ki, bu mərhələdə Braziliyanın 5, Argentina, Çili və Uruqvayın hərəyə 1 komandası çıxış edir. İlk yarımfinalçı “River Pleyt” oldu. Çilidə keçirilən oyunda “Kolo Kolo” ilə 1:1 hesabına razılaşan Argentina nəhəngi evdə Kolidionun yeganə qolu ilə ən güclü 4 komanda sırasına çıxdı. “Fluminense” evdə “Atletiko Mineyro”nu son dəqiqələrdə vurulan yeganə qolla məğlub etmişdi. Amma minimalhesablı qələbə LK-nın son çempionu üçün kifayət etmədi. “Atletiko Mineyro” evdə Deyversonun fasilədən sonra iki cavabsız qolu ilə yarımfinala adladı. Meydan sahiblərinin təcrübəli hücumçusu Halkın 8-ci dəqiqədə penaltidən yararlana bilmədiyini də qeyd edək. Digər Braziliya duelində cavab görüşü də heç-heçə nəticələndi. Rio de Janeyroda keçirilən ilk oyunda hesab açılmamışdı. “San Paulu” - “Botafoqo” matçı isə 1:1 hesabı ilə nəticələndi. LK-nın reqlamentinə əsasən, əsas vaxt sona çatan kimi penalti seriyası tətbiq edilir. Bu sınaqdan 5:4 hesabı ilə üstün çıxan “Botafoqo” yarımfinala vəsiqə qazandı. Braziliyanın turnirdəki digər təmsilçisi “Flamenqo” evdə “Penyarol”a minimalhesablı məğlubiyyətin əvəzini Montevideoda çıxa bilmədi: qolsuz “sülh” Uruqvay klubunun mərhələni adlamasına şərait yaratdı.

Beləliklə, ilk oyunları oktyabrın 23-nə təyin olunan yarımfinalda “Atletiko Mineyro” “River Pleyt”, “Botafoqo” isə “Penyarol” ilə qarşılaşacaq.

1/4 final, cavab oyunları
River Pleyt (Argentina) - Kolo Kolo (Çili) 1:0 (ilk oyun - 1:1)
Kolidio, 16.

Atletiko Mineyro (Braziliya) - Fluminense (Braziliya) 2:0 (0:1)
Deyverson, 50; 88.

San Paulu (Braziliya) - Botafoqo (Rio de Janeyro, Braziliya) 1:1, p. – 4:5 (0:0)
Kalyeri, 87 – Almada, 15.

Penyarol (Uruqvay) - Flamenqo (Braziliya) 0:0 (1:0)