Ramil Şeydayevin “Qarabağ”a üçüncü gəlişi rəsmiləşdi. Adətən, məşhur və mərhum akademik Püstəxanım Əzizbəyovun evlilik sayi ilə bağlı işlədilən lətifə ifadəsi təcrübəli hücumçuya da aid olundu. Amma futbol başqa, gündəlik həyat başqa.

“Qarabağ”da uğurlu oyun göstərən, uğursuz karyeradan sonra yenidən bu komandaya dönən futbolçuları çox görmüşük. Bəlkə hətta “11-lik” də qurmaq olar. Amma indi məsələ başqadı. Ramil Şeydayev ikinci qayıdışında da uğurlu ola biləcəkmi? O, ilk dəfə “Qarabağ”a gələndə də ağdamlılar Çempionlar Liqasında mübarizə apararırdı. Cəmi bir mövsümlük “Qarabağ” karyerasında 14 oyuna çıxan Şeydayev 1 qolla yadda qalmışdı. İkinci dəfə gələndə isə təxminən iki oyuna bir qol vururdu - 60 oyun, 29 qol. 2022/23 mövsümündə çempionatın bombardiri olan Ramil Şeydayev avrokuboklarda da vacib qollar vurmuşdu. Qurbanovun kameralara düşən qol sevincinə də elə o, səbəbkar olmuşdu - “Olimpiakos”la səfər oyununda Marselonu keçərək qapıya “raket göndərmişdi”. Bəs bu dəfə uğurlu ola biləcəkmi?

Uğursuz “Buriram Yunayted”, “Kocaelispor” və “Neftçi” karyerasından sonra bu onun böyük klublarda şon sansıdı. Aydındı ki, Qurban Qurbanov onu yenidən komandanın əsas fiquru, liderlərindən biri olacağına inandırıb. Bunun üçün isə ən azı mövsümün sonuna qədər özünü göstərməlidi. Yəqin ki, çempionatda daim oynamağa başlayacaq. Məşqlərdə də özünü yaxşı göstərsə, gələn mövsüm avrokuboklar üçün “Qarabağ”ın heyəti bir az da genişlənəcək. Ramil martda 30 yaşını tamamlayacaq. Az yaş deyil. Amma çox da deyil. Qurbanovun sehrli çubuğu ona “ikinci bahar”ı yaşada bilər. Hətta yenidən milliyə dönməsi də mümkündü. Sadəcə, özünü yenidən göstərməlidi. Təsadüfi deyil ki, müqavilə müddəti cəmi bir ildi. Ramil yayda yaxşı təlim-məşq toplanışı keçib. Hətta bəlkə “Qarabağ”ın futbolçularından daha çox çalışıb. Komandaya uyğunlaşmaqda da problem yaşamayacaq. Heyətdəkilərin çoxu ilə əvvəldən tanışdı. Onlar da Ramilə kömək edəcək. “Qarabağ” kimi klubda isə çempionat bombardiri olmaq elə də çətin məsələ deyil. Onun “tərcümeyi-hal”ında artıq belə uğur var.

Amma şər deməsən xeyir gəlməz - uğursuz da ola bilər. Son ayyarım, iki ayda komanda şəklində məşq etməyib. Məhz bu məqam ona problem yarada bilər. Komandada əvvəlki mehribanlıqla qarşılaşmayıb, psixoloji zərbə də ala bilər. Hazırda Duranı da saysaq, “Qarabağ”da dörd hücumçu var - Nəriman, Musa, Kamilo və Ramil. Qurbanov isə özünü göstərnə şans verəcək. Təbii ki, Ramili bacaracağına inandırıb. Bir sözlə, hər şey Şeydayevin öz əlindədi. Özünü sübut etməli, yeni şans qazanmalıdı. Buna məhkumdu. Yoxsa autsayder elita təmsilçiləri, 1-ci liqa klubları onun yolunu gözləyir.

Ramil iki mövsüm əvvəl “Qarabağ”ın yaşıl yarpağı idi. Hazırda payız dövründədi. Amma fəsillər dövran edir. Atalar necə deyib, “Çiçəyin vaxtı ötüb getsə də, yaxşı yarpaq yenə də yaşarar”.

MÜZƏFFƏR QULUZADƏ