Qurban Qurbanovun Ramil Şeydayevə xüsusi simpatiya bəsləməsi heç kimə sirr deyil. Bəlkə də “Qarabağ”ın baş məşqçisi ona hücumçu kimi çin olmayan arzularının təcəssümü, özünün zamanında vura bilmədiyi hansısa qolların yaradıcısı kimi baxır.

Ramil “Buriram Yunayted”ə gedəndə Qurbanovun onu qucaqlayıb kədərləndiyini də görmüşük, səfərdəki avrokubok oyununda hansısa möhtəşəm qoldan sonra ovurdunu şişirdib, əllərini göyə qaldırıb əlahiddə sevinc təntənəsi göstərməsini də. Və Qurban bəy uzunmüddətli hücumçu axtarışından sonra bir başqasının yox, məhz Şeydayevin üzərində dayandı. Qurbanov və “Qarabağ” 3-cü dəfə Ramilə qucaq açdı.

Kamilo Duranın Lissabondakı mükəmməl oyununu, Nəriman Axundzadə ilə Musa Qurbanlının varlığını, üstəlik Şeydayevin gəlişini nəzərə alsaq, “Qarabağ” bu heyətlə oynaya-gülə Azərbaycan çempionu olacaq. “Zirə”, “Araz-Naxçıvan”, “Neftçi” və başqaları indidən 2-3-cü yerlərlə bağlı planlar qursalar yaxşıdı. Bu dediklərim reallıqdı, amma növbəti ayların söhbətidi.

İndi hər kəsi düşündürən məqam başqadı: Ramil əvvəlki formasını bərpa edə, yenidən bombardirlik uğrunda mübarizəyə dönə, yığmaya qayıda biləcəkmi? 29 yaş bir hücumçu üçün nə azdı, nə də çox. Yəni onun yaşa dolduğunu, məhz bu üzdən bir daha əvvəlki səviyyəyə dönə bilməyəcəyini düşünmək sadəlövhlük olardı. Ramil Rusiya futbolunun yetirməsidi, həmin ölkədə yetərincə tanınır, Türkiyə, Slovakiya və Taylandda legioner həyatı da yaşayıb. Çiynində illərin təcrübəsi, çoxlu beynəlxalq oyun praktikası var.

Əslində Qurban bəy Şeydayevə həm də etimad krediti təklif edir. Baxın, biz bu mütəxəssisin “Qarabağ”dakı inanılmaz uğurlarından danışarkən bütün məsələlərdə söz sahibi olmasını, həlledici və doğru qərarlar verməsini önə çəkirik. Qurbanov klubda gördüyü etimadı və güvəni yığmanın baş məşqçisi olanda AFFA-nın divarları arasında görmədi, duymadı, ilk növbətə məhz buna görə uğursuzluğa düçar oldu. İndi isə Şeydayevə həmin münasibəti göstərir. Ramil 2023-də “Qarabağ”dan ayrılandan sonra nə “Buriram Yunayted”ə, nə “Kocaelispor”a, nə də “Neftçi”yə doğmalaşdı; hər yerdə yad oğlan, maşının 5-ci təkəri kimi göründü.

Qurban bəy səxavətlə, könül açıqlığı ilə ona növbəti şansı verir. Nədənsə mənə elə gəlir ki, bu, futbolçu Ramil Şeydayev üçün özünüifadə, sözünü ucadan demək baxımından son şansdı. Yox, bu dəfə də alınmasa, onda Ramilin özünə yaşıl meydandan kənarda bir peşə tapması lazımdı!

ORXAN