Özümüzü aldatmayaq, Ramil Şeydayev artıq “Qarabağ”dadı. O, “Qarabağ”a görə “Neftçi”dən ayrılmağa razılaşdı. Amma nə qədər təzminat alıb, bu bəlli deyil. Ramil Şeydayev parladığı yerə döndü. 2017/18 mövsümündə və 2021-23 aralığında “Qarabağ”ın formasını geyən 29 yaşlı hücumçu bəlkə də səhvini anladı, bəlkə də başqa çıxış yolu olmadığına görə belə addım atdı. Necə ki o vaxt “Sabah”da qapazaltı olandan sonra “Qarabağ”da, Qurban Qurbanovun sehrli çubuğu ilə çempionatda bombardir oldu, indi də buna ümid edir. Bu mümkündümü? Bəli, mümkündü. Amma söhbət ondan gedir ki, niyə Ramili transfer etdi “köhlən atlar”? Əslində bunun da cavabı bəllidi. Nəriman zədələnib. Əsas hücumçu Musadı. Allah uzaq eləsin... Yəqin anladız.

Bəs ağdamlılar bu qədər futbolçu qala-qala, niyə Ramili transfer etdi? Bu adam “Qarabağ”dan gedəndən normal futbol oynamayıb. Və növbəti “Qarabağ”da uğurlu olub, başqa kluba gedəndən sonra uğursuzluq üzündən qayıdan futbolçu. Bu siyahıya saysız-hesabsız ad yazmaq olar: Reynaldo, Almeyda, Şahruddin, Kadi, Patrik... “11-lik” qurmaq olar, hələ ehtiyata da futbolçu qalar. Belə çıxır ki, Qurbanovun ilahi təsir gücü var...

Yaxşı, Şeydayevi alacaqdızsa, elə bir həftə əvvəl alıb Çempionlar Liqası üçün iştirak ərizəsinə də salardız da...

MÜZƏFFƏR QULUZADƏ