İngiltərə premyer-liqasında dekabrın ən yaxşıları müəyyənləşib. İki nominasiya üzrə müxtəlif klubların üzvləri qalib adını qazanıblar.

"Football-plus.az" xəbər verir ki, ötən ilin son ayının ən yaxşı futbolçusu adına “Nyukasl”ın hücumçusu Aleksander İsak layiq bilinib. Bütün həmkarlarını qabaqlayan isveçli futbolçu dekabrda premyer-liqada meydana çıxdığı 6 oyunda 8 qol vurmuş, 2 məhsuldar ötürmə vermişdi.

Qeyd edək ki, ayın ən yaxşı futbolçusu adına “Liverpul”un hücumçusu Məhəmməd Salahla “Çelsi”nin yarımmüdafiəçisi Koul Palmer də namizəd idi.

Dekabrın ən yaxşı məşqçisi üçün ayrılan mükafata “Nottingem Forest”i çalışdıran Nunu Eşpiritu Santu layiq bilinib.

Portuqaliyalı mütəxəssisin komandası ötən ay premyer-liqada keçirdiyi 6 oyunda 5 qələbə qazanmış və 1 dəfə məğlub olmuşdu. Yeri gəlmişkən, “Nottingem Forest” hazırda turnir cədvəlində 40 xalla 3-cü yeri tutur.