Yığmamız DÇ-2026-ın seçmə mərhələsində ilk iki oyunu arxada qoydu. Reykyavikdə tarixə qara hərflərlə yazılan məğlubiyyətin ardından Bakıda İslandiyadan daha güclü Ukraynadan 1 xal ala bildik. Fərqli olan əsas məqam hamıya bəllidi – baş məşqçi dəyişmişdi. Nə isə, sözüm bunda deyil, başqa dərdim var - Mahir Emreli...

Nə qədər ağır olsa da, futbolumuzun əsas ulduzu Mahirdi. Ən irəlidə gedəni, Rusiyada dünyaya gəlib Azərbaycanda böyüsə də, beş ildi israrla legioner həyatı yaşayanı. Amma nə xeyrini görmüşük? “Legiya”ya təzə-təzə gedəndə Avropa Liqasında “Lester”ə, “Napoli”yə qol vurdu, Azərbaycan mediası – biz qarışıq – onun piarını apardıq, sonra çempionatdakı uğursuzluqdan, azarkeş təzyiqindən bezib Zaqrebə - “Dinamo”ya yollandı. “Dinamo” əslində ad-san baxımından Varşava təmsilçisindən daha nüfuzlu klubdu, amma özünü göstərənə.
Sən isə ancaq ehtiyatda qaldın, Mahir - gah zədələr, gah da rəqabətə davam gətirə bilməmək üzündən. Ehtiyatda qala-qala titullar qazandın. Xorvatiyalı azarkeşlər biz Redon Cicanı, Xayme Romeronu gördüyümüz kimi görürdülər səni.

Yarım mövsüm “Konyaspor”da oynadın, türk qardaşlarımız da səni saxlamağa cəhd etmədi. Müntəzəm Çempionlar Liqasında oynayan “Dinamo”da vur-tut bir hissə oynamadın. Qrupun son, heç bir əhəmiyyəti qalmayan matçıdan “Çelsi”yə qarşı 10-15 dəqiqə oynadıq. Həmişə başımızın üstündə tutduq səni, amma sən bu istəyin fərqində olmadın sanki.

“Nürnberq”ə getdin, nə oldu? Statistika uğuru görünür – 24 oyun, 10 qol. 34 turluq çempionatda 24 oyuna çıxdın, bu oyunlarda da ya sona yaxın meydana çıxdın, ya da start heyətində oynayıb, sonradan oyundan alındın. Miroslav Kloze ilə yaxşı yola getmədin, “Nürnberq” mərhələsinin nə sənə xeyri oldu, nə də bizə. Bizə deyəndə milli komandanı nəzərdə tuturam. Bu məsələyə də qayıdacam.

“Nürnberq” mövsüm başa çatmamış səninlə yolları ayırmağa qərar verdi. Camaat 2-ci bundesliqadan “Brügge”yə, 1-ci bundesliqaya, başqa səviyyəli yerlərə gedir, sən isə “Nürnberq”lə eyni səviyyədə olan “Kayzerslautern”i seçdin. Halbuki önündə 1-ci bundesliqadan da təklif var idi. Bu dəfə də pul sənə karyerandan daha önəmli oldu. “Kayzerslautern”də də məşqçinin planları şəxsi nəticələrini aşağı salır. Gözləniləni ala bilmirik səndən. “Kayzerslautern”lə oyunda het-trik edən Mahir “Kayzerslautern”də 90 dəqiqə oynaya bilmir.

Nəyə görə yaşayırsan legioner həyatını? Legionerliyin məqsədi yığmaya daha çox xeyir verməkdi, təcrübəni komandaya ötürməkdi. Sən nə edirsən? İslandiya və Ukrayna ilə matçlarda iki zərbə vurmusan. Bu zərbələr də “çərçivə”yə getməyib. Biri aya gedib, o biri çaya. Yığmanı bataqlıqdan çıxarmağa töhfə verməyəcəksənsə, niyə getmisən Almaniyaya? Pula görə? Ona qalsa, bəlkə “Neftçi” sənə Almaniyadakından daha çox pul verər. Yığmaya xeyrin yoxdusa, daha nəyə lazımdı bu karyera? Qəsəbə təmsilçilərinin də futbolçuları İbitsaya gedir istirahətə.

İstəyirsənsə, “Deportivo”ya get. O da İspaniyanın sequndasıdı – ikinci dərəcəli çempionatıdı. Həm İbitsa kimi şəhərdə qalarsan, həm də rahat istirahət edərsən. Sən hücumçusan. Hücumçunun işi qol vurmaqdı, qola şərait yaratmaqdı. 10 ilə yaxındı əsas yığmanın üzvüsən, 56 oyuna çıxmısan, cəmi 6 qolun var. Bu statistika ilə də fəxr edirik ki, Mahirimiz var. Ukrayna ilə oyun da sən və çiyindaşın Renat meydandan çıxandan sonra sürətləndi. Musanın o qısa müddətdə etdiyini sən nə İslandiyada, nə də Bakıda etdin.

Sən Qurban Qurbanovun inadkarlığının layihəsisən. Necə Nəriman Axundzadə, necə Şahruddin Məhəmmədəliyev, necə Əfran İsmayılov, elə də sən. Bir-iki həftə yox, daim uğurlu olmaq lazımdı. Təəssüf ki, sən bunu bacarmırsan. Uman yerdən küsərlər! Görünür, səndən ummaqla böyük səhv etmişik!

MÜZƏFFƏR QULUZADƏ