Ölkəmizin futbol yığması bu gün dünya çempionatının seçmə mərhələsi çərçivəsində ilk oyuna çıxacaq – İslandiyanın qonağı olacaq.

Dünən AFFA-nın baş katibi Cahangir Fərəcullayev oyunöncəsi məşq zamanı azərbaycanlı jurnalistlərin suallarını cavabladı.

- Komanda üç gündü burdadı. Hazırdımı? Fernando Santuş hava şəraitini, saat fərqini nəzərə alıb tez gəlməyi tələb etdi, AFFA rəhbərliyi xərclər çox olsa da, buna razılaşdı. Bəs qarşılığında Santuşdan nə tələb edir?
- Yaxşı sualdı. Ab-hava çox yaxşıdı. Hamı istəklidi. Santuş onu tələb etməmişdi, sadəcə, müzakirənin bir hissəsi idi. Bu təklifi məqbul saydıq, tələbi yerinə yetirdik. Bizim komanda qarşısına tələbimiz yoxdu. Onlar özləri özlərindən tələb etməlidilər. Məncə, tələb edirlər.

- Tələbiniz yoxdu, bəs vədiniz var?
- Məncə, futbolda vəd vermək düzgün deyil. Vəd odu ki, uşaqlar əllərindən gələni edib azarkeşləri sevindirsin.

- Vəd deyəndə mükafatı nəzərdə tuturdum.
- Bu komandadaxili məsələdi. Bizə motivasiya lazımdı. Uşaqlar motivasiyalıdı. Bunu bilmək yetərlidi.

- Sabah hansı nəticə məqbul sayılacaq?
- İstənilən idman növündə udmaq istəyirsən. Biz də udmaq istəyirik.

- Jurnalistlər, futbol ictimaiyyəti arasında belə fikirlər var ki, bu iki oyun Santuş üçün sonuncu ola bilər. AFFA rəhbərliyində də bu yöndə hansısa qənaət formalaşıbmı?
- Qənaət yoxdu. Mərhələnin ilk oyunu ərəfəsindəyik. Bədbin düşünmək olmaz. Bəd fikir formalaşsaydı, Fernando Santuş burda olmazdı.

- Adətən böyük turnirlərdən öncə AFFA prezidenti futbolçularla görüşürdü. Bu görüş baş tutmadı?
- Görürəm, məlumatlısız (gülür). AFFA rəhbərliyi komanda ilə görüşüb, qayğıları ilə maraqlanıb. Yaxşı müzakirə olub.

- Adətən, belə görüşlər ictimaiyyətə açıqlanırdı, gizli qalmırdı.
- Gizli deyil, komandadaxili yığıncaq, dost görüşü idi.

MAHİR RÜSTƏMLİ

Jurnalistlərin İslandiya səfəri Misli və AFFA-nın dəstəyi ilə həyata keçirilib.