“Karvan-Yevlax” evdə “Qarabağ”a məğlub oldu.

“Football-plus.az” xəbər verir ki, Azər Həşimov oyundan sonra jurnalistlər önünə çıxıb.

- “Qarabağ”ı Çempionlar Liqası münasibətilə təbrik edirəm. Başda Qurban Qurbanov olmaqla komandasını və xalqımızı təbrik edirəm. Üçüncü oyunumuz idi. Oyunlarımızı təhlil edirik. Yevlaxdan gələn azarkeşlərə minnətdarlığımı bildirirəm. 180 km qət edib, gəlib bizə dəstək olurlar. “Qarabağ” çox güclü komandadı. Komandamız onlara qarşı döyüşkən mübarizə apardı. İkinci hissədə qol vura bildilər. Bugünkü qələbəyə görə də “Qarabağ”ı təbrik edirəm.

- İsinmə hərəkətləri zamanı Mikels zədələndi. Durumu necədi?
- Futbol komanda oyunudu. Mikels olsaydı, daha da yaxşı ola bilərdi. Kiçik zədəsi var, sabah ağırlıq dərəcəsi bilinəcək. Olsaydı, daha yaxşı olardı, Uğur onu layiqincə əvəz etdi.

- Motivasiya problemi olmadı ki? Durumu nə yerdədi?
- “Qarabağ” adı özü motivasiyadı. Hamımızın fəxridi. Futbolçu kimi də, məşqçi kimi də anlayırıq ki, rəqibdən çəkinmək lazım deyil. Adlar yox, rəqiblər önəmlidi. Futbolçular döyüşkən oynadı.

- Bu üç oyunda komandada nə dəyişib? Hədəfiniz dəyişib?
- Fikrimiz yenə elitada qalmaqdı. Mən demişdim ki, heç bir komandaya asan məğlub olmayacağıq. Əzmkar oyun göstəririk. Azarkeşlərin qəlbinə yatan oyun oynamağa çalışacağıq.

MÜZƏFFƏR QULUZADƏ