“Qarabağ”ın səfərdə “Karvan-Yevlax”ı 2:0 hesabıyla məğlub etdiyi oyundan sonra ağdamlıların baş məşqçisi Qurban Qurbanov jurnalistlər önünə çıxdı.

“Football-plus.az” onun mətbuat konfransından hesabatı təqdim edir.

- Komandanı təbrik edirəm. Asan qələbə olmadı. Belə şəraitdə oynamaq çətin idi. Bizim üçün vacib oyun idi. “İmarət” də gəlmişdi, təşəkkür edirəm onlara. Rəqibimiz əvvəlki oyunlarını da yaxşı keçirmişdi, bu gün də yaxşı oynadıq.

- “Benfika” ilə oyuna hazırlaşan komandanı bu oyuna kökləmək çətin deyil ki?
- O oyuna hazırlaşmağı düşünmürük. O atmosferdən çıxıb burda oynamaq asan deyil. Çox istərdik ki, daha yaxşı meydança və daha çox azarkeş olsun. Futbolçular üçün bunlar çox önəmlidi.

– Montiel hələ də oynamayıb. Nəyə görə?
– Problemi yoxdu, sadəcə, hazır deyil. Fərdi qaydada məşq edirdi, artıq komanda ilə məşqlərə qoşulub. Milli fasilədə, yəqin ki, özünə gələcək.

- “Neftçi”nin “Qarabağ”ı təbrik etməməsinə necə yanaşdız?
- Samir bizi həmişə təbrik edir telefon vasitəsilə. Amma klubun təbrik etməməsinə ciddi yanaşmamışdım. Hər klubun öz yanaşması var. Buna görə “Neftçi”dən incimirəm. Hər klubun idarə olunması fərqlidi. Rəhbərlik və Samir bizim dostlarımızdı. Pley-off oyunundakı qələbədən sonra da təbrik etdilər. “Neftçi” hamımızın “Neftçi”sidi.

- Sambu və Juninyo ilə danışıqlar gedirmi?
- Çox ağır gedir. Təklif də olub. Əsas mərhələyə düşdük deyə qarşı tərəf həddən artıq yuxarıdan getdi. Bizdə vaxt məhdudiyyəti var. Danışıqlar çox çətin gedir.

- Təqvimdən razısız?
- Normaldı, keçəl Həsən, Həsən keçəl (gülür).

- Legioner limitinin ləğvi nələr verdi, nələr aldı?
- Komandalar daha da ciddiləşib, amma hələ ki fikirləşmək tezdi.

- Hikmət ikinci oyundu əsas heyətdədi. Necə dəyərləndirirsiz oyununu?
– Normal. Bu hələ Hikmətin performansının yarısıdı. Daha da yaxşı olacaq. Məşqlərdə də özünü yaxşı göstərir.

MÜZƏFFƏR QULUZADƏ