“Qarabağ”ı təbrik edirəm” - Samir Abasov
“Neftçi” Misli premyer-liqasının 3-cü turunda da qələbə qazana bilmədi - 0:1.
“Football-plus.az” xəbər verir ki, “ağ-qaralar”ın baş məşqçisi Samir Abasov media jurnalistlərin suallarını cavablayıb.
- Komandanız niyə qol vura bilmir?
- Epizodlar yaratdıq. Təəssüf ki, bəxtimiz gətirmədi. Əvvəlki oyunlarda da belə idi. Digər matçlara baxanda, bu gün başqa “Neftçi” var idi. Çox ritmli və dinamik idik. İlk dəqiqədən bəlli idi ki, komandanın niyyəti nədi... Qol buraxdıqdan sonra da təzyiqi davam etdirdik. Futbolçular çox istəyirdi ki, qol vuraq, qələbə qazanaq. İkinci hissədə qırmızı vərəqə planları pozdu. 10 nəfər qaldıqdan sonra müdafiəçilər soyuqqanlı oynadılar. Qapımızda təhlükəli epizod görmədən, uduzduğumuz oyun oldu. Futbolçulara təşəkkür edirəm. Səhvlər olacaq, tələskənlikdən irəli gələn səhvlər olacaq. Başa düşürük. Yaxşı işlər etməyə qadirik. Bu siqnalı futbolçularda gördüm.
- Erkən qol planlarınızı nə qədər pozdu? Buraxılan qolda qapıçınızın səhvi var idi. Onu cəza gözləyir
- Rəqibə fürsət vermirdik. Bu da üzərində durduğumuz məqam idi. Reallıqda qapıçının səhvi var. Amma bir səhvlə onu silmək, nəsə fikir bildirmək istəmirəm. Digər oyunçular da səhv edə bilər. Kenanın yanındayıq. İnanıram ki, təcrübəsini, digər liqalardakı performansını bizdə də göstərəcək. İşimiz oyunçu cəzalandırmaq deyil.
- Piriç superliqada 34 oyunda 67 qol buraxıb. Bu mövsüm də komandanın buraxdığı hər iki qolda səhvi var. Növbəti oyunlarda “Neftçi” Piriçə görə xallar itirə bilər?
- Düşünmürük. İstəmirəm ki, ayrı-ayrılıqda futbolçuların üzərində duraq. Hansısa futbolçunun səhvindən uduzacağıqsa, hər bir adam səhv edə bilər. Əsas odu ki, futbolçunu qoruyaq. Superliqadan qapıçı gətirmək asan iş deyil. “Neftçi” bunu etdi. “Antalyaspor”u çox analiz etmisiz, mənim o qədər məlumatım yoxdu.
- İndiki məqamda sizi nə məmnun edir?
- Bugünkü oyun bizim üçün siqnal və ümiddi. Bəhanə deyil. Birinci hissədə oynayan futbolçuların performansında əskiklik var. Bu komanda çox yaxşı işlər görəcək. Yetərincə yaxşı futbolçular var, bunu bacaracaqlar. Sadəcə xal itirdikdən sonra nələr etdik? Bunu demək çətindi. Komandama inanıram.
- Əliyar Ağayev işinin öhdəsindən gəldi?
- Onun hansı səviyyədə referi olması hamıya bəllidi. Bugünkü oyunda referilərdən narazı qaldım. Penalti epizodunu indi izah edə bilmirəm. Rəqibə ikinci sarı vərəqə vermək olardı. Məncə, bir tərəfə daha çox simpatiya var idi. Heç xoşuma gəlmədi. Bizim əsəblərimizlə oynadılar. Qırmızı vərəqə haqlı idi? Rəqib bizi provokasiyaya çəkdi. Ribeyronun ixtiyarı yoxdu ki, provokasiyaya cavab versin. İncələmək lazımdı. Əliyar orda gördüsə, qırmızı vərəqə qərarı verdisə, onun yanındayam, dəstəkləyirəm, inanıram. Mən digər məsələləri deyirəm. Biz özümüzü ev komandası kimi hiss etmədik. Dəhşətdi.
- “Neftçi” xal itirməyə davam edir. Qorxmursuz ki, istefanıza səbəb ola bilər?
- Ola bilər. Futboldu.
- “Qarabağ”ı təbrik etməməkdə sizi qınayırlar. Azarkeşlər də deyirlər ki, niyə Samir bəy “Qarabağ”ı təbrik etməyib…
- Təbrik etsəm, “Qarabağ”ın rəqibi kimi digər azarkeşlər deyəcək ki, niyə rəqibi təbrik edirsən? Nəysə. Bütün məşqçilər təbrik edib? Təbrik edən məşqçilərin qrupunda mən yoxam (gülür). Təbrik edirəm “Qarabağ”ı.
- “Turan Tovuz” hücum futbolu oynayan komandadı. Ya məşqçi taktiki sxemi düzgün vermir. Ya da futbolçuların səviyyəsi o deyil…
- Məşqçi taktikası barədə hər şeyə cavab vermirəm. Şəxsi fikirdi, hörmətlə yanaşıram. İkinci məsələni isə qəbul etmirəm. Futbolçularımın səviyyəsi haqda imkan vermərəm ki, danışsınlar. Yaxşı səviyyədədilər. Bu gün eyni ssenari davam edirdi.
- Niyə komanda asmalar etmir? “İmişli” ilə görüşdə ilk asmanı 56-cı, bu gün isə 45+1-ci dəqiqədə etdiz. Axı Sek və Sako kimi bunu bacaran futbolçular var - - Sako yüksək səviyyədə oynadı. Oyun üslubu var. Bu gün nəzərə alsaq ki, onların üç iri boylu müdafiəçisi var idi. Başla oynayırlar. Bu halda asma anlaşılmazlıq olardı. Rəqibdə "1,50-lik" müdafiəçilər də olsaydı, bizim oyun üslubumuz yenə tamam başqa olardı. Bu gün məşqlərdə bir şeyi tələb ediriksə, oyunda başqa şey tələb etmək düzgün deyil. Bu sualla futbolçunu da yolundan çıxarmış oluruq. Bu, sırf oyun üslubundan irəli gələn məsələdi.