Misli premyer-liqasının 2-ci turunda “Zirə” səfərdə “Qəbələ”ni 2:1 hesabıyla məğlub etdi.

Qonaqların baş məşqçisi Rəşad Sadıqov oyundan sonra mətbuak konfransı keçirdi.

- İlk turda ən parlaq oyun nümayiş etdirən komandaya qarşı oynadıq. Çoxlu qol vəziyyəti yaratdıq. Uzun zamandan sonra evdə ilk oyunları idi. Rəqib fərqləndi və biz də vacib qollar vurub, qələbə qazandıq. Şükür ki, belə oyunda qələbə qazana bildik. “Kəpəz”lə oyunumuz var, ona köklənməliyik.

- Suma ilə Utziqin yoxluğu media sektorundan hiss olunur. Bəs texniki zonadan necə?
- Sumanın yerində oynayan Ceyhun iki qol vurdu, Martins də yaxşı oynadı. Bu gün yaxşı oynadıq. Mən yoxluqlarını hiss etmədim.

- Avrokuboklarda hiss olundu.
- Avrokuboklar heç. Digər futbolçularımız formaya düşsün, daha yaxşı olacaq.

- Eltun Turabovla aranızda nə baş verdi? Sıradan gedişə oxşamadı.
- Sıradan gediş idi. Futbola fasilə vermək istədi.

- Mövsümün büdcəsi və hədəfi nədi?
- Elə məsələ var ki, mətbuat qarşısında danışa bilmirik. Büdcə iki dəfə azalsa da, biz öz işimizi görməliyik. Öz işimizi görürük.

- Qarşıdakı turda “Kəpəz”lə oynayacaqsız. Bu işinizi asanlaşdırmır?
- Əksinə, heç istəməzdim “Kəpəz”ə qarşı oynayaq. Azarkeşləri və özlərini doğrultmaq üçün əllərindən gələni edəcəklər. Əlimizdən gələni edəcəyik ki, qələbə qazanaq. Son oyunda da yaxşı oyun oynadılar.

MÜZƏFFƏR QULUZADƏ