"Sabah" Misli premyer-liqasının 2-ci tur matçında "Şamaxı"nın meydanından qələbəylə ayrıldı - 2:1.

"Football-plus.az" xəbər verir ki, "bayquşlar"ın baş məşqçisi Valdas Dambrauskas oyunsonrası mətbuat konfransında jurnalistlərin suallarını cavabladı.

- "Sabah" ailəsini təbrik edirəm. Bildiyim qədər, 4 il idi ki, Şamaxıda qələbə qazana bilmirdik. Rəqib çox çətindi. Bura gələn bütün komandalar gücünün yüz faizini sərf etməlidi. Oyuna çox yaxşı başladıq. Hesabı erkən açmaq üçün həftə ərzində məşq etmişdik. Uğurlu alındı. Birinci hissədə daha çox qola vura bilərdik. Xeyli təhlükəli epizod yaratmışdıq. İkinci yarıda isə rəqib boşluq verməməyə çalışdı. Hətta qol da vurdular. Komandamın bundan sonrakı oyunu xoşuma gəldi. Yenidən özlərini toparlayıb qələbə qolunu vurdular. Növbəti oyuna köklənəcəyik. Sabah məşqimiz var. Kollektivlər yeni mövsümə böyük ümidlərlə başlayıb. İddialı komandalar belə xal itiriblər. Səfərdə üç xal qazandığımız üçün çox xoşbəxtəm. Düzdü, birinci turda "Qarabağ"a qarşı matçımız təxirə salınıb. Hər halda, ilk oyunumuzda qələbə qazandıq. Belə davam etmək istəyirik.

- Azərbaycan çempionatı sizdə hansı təəssüratları oyatdı?
- Avrokubok oyunlarından sonra ölkə çempionatına köklənmək asan deyil. Futbolçunun motivasiyası və nizam-intizamıyla bağlı narahatlıqlar olur. Bəli, biz avrokuboklarda 6 oyun keçirmişdik. Ancaq bu matça qədər 10 gün fasilə oldu. Oyun ritmindən uzaq qalmışdıq. Mən Azərbaycan futbolunun eksperti deyiləm. Ancaq izlədiyimiz matçlara əsasən deyə bilərəm ki, turnirdə favorit yoxdu. "Qarabağ" və "Neftçi" xal itirib. Hər komanda xal qazanmaq üçün əlindən gələni edir. Fikirləşirəm ki, hamımız birlikdə böyüməliyik. İnfrastuktur daha da inkişaf etməli, klublar daha keyfiyyətli futbolçularla güclənməlidi.

- Mikelslə Noqeyra arasında nə baş vermişdi?
- Bu cür hallardan məmnun deyiləm. Ancaq mübahisənin səbəbi daha yaxşını etmək istəmələri idi. Hər şey geridə qaldı. Oyundan sonra bir-biriylə qucaqlaşdılar. Məncə, bu məsələ bağlandı.

- Hədəfə çatmaq üçün daha neçə legioner transfer etmək lazımdı?
- Sualınız məni təəccübləndirdi. Futbolçuların məşqə yanaşma tərzi diqqətimdədi. Onların hansı ölkənin pasportunu daşımaları mənim üçün önəmli deyil. Kim özünü yaxşı göstərsə, ona şans verilir. Yeni futbolçular axtarılır. Ancaq məhz legioner transfer etmək niyyətimiz yoxdu. Hansısa yerli oyunçu xoşumuza gəlsə, onu da ala bilərik. Əlimdə olan heyətdən də razıyam.

- "Qarabağ" avrokuboklardakı çıxışını davam etdirdiyinə görə, ölkə çempionatında daha çox ikinci heyətinə şans verir. Belədə "Qarabağ"ı keçmək və ya sona qədər çempionluq uğrunda mübarizə aparmaq niyyətiniz varmı?
- Bu barədə çox danışa bilmərəm. "Qarabağ"ın hansı heyətlə çıxış etməsi önəmli məqam deyil. Öz oyunçularımdan məmnunam. 10 ay sonra nələrin baş verəcəyini deyə bilmərəm. Hazırda "İmişli"yə qarşı oyunu fikirləşirik. Məncə, hazırda ən önəmli matç məhz qarşıdakı görüşdü.

KƏNAN BAHADIR