Fransa çempionatında yeni mövsüm start götürdü. PSJ “Nant”ın öhdəsindən çətinliklə gəldi – 1:0.

Bu, ilk turun ən populyar hesabıdı. Yeddi oyunda məhz bir qol vuruldu. Yalnız “Monako”nun “Havr” üzərindəki qələbəsi (3:1) və “Brest” – “Lill” oyunundakı heç-heçə (3:3) istisna oldu.
PSJ UEFA Superkuboku uğrundakı oyunda “Tottenhem” üzərində qazandığı əzmkar qələbənin ardından “Nant”ın qonağı idi. Nə qədər təəccüb doğursa da, bu oyunda ilk təhlükəli vəziyyət 42-ci dəqiqədə yarandı. Onda da Ramuş topu tirə vurdu. Luis Enrikenin komandası ilk yarıda önəmli üstünlüyə malik olsa da, “bülbüllər” qapısı önündə təhlükəli vəziyyət yaranmasına imkan vermirdi. Yəni komandaların fasiləyə 0:0 hesabıyla yollanması oyunun axarına uyğun idi.

2-ci hissənin əvvəlində də meydanda maraqlı hadisə baş vermədi. Vəziyyəti belə görən ispaniyalı mütəxəssis 61-ci dəqiqədə 4 futbolçunu əvəzlədi – Hakimi, Mendeş, Dembele və Due mübarizəyə qoşuldu. “Nant”ın müdafiə xəttinə artan təzyiq dərhal nəticə verdi. Vitinyanın cərimə meydançası xaricindən vurduğu zərbədən sonra müdafiəçinin kürəyinə toxunan top qapıçını da yanıldıb tora düşdü. Qoldan sonra meydanda praqmatik, təhlükəli vəziyyətlər sarıdan yoxsul oyun getdi və hesab dəyişmədi.

Səfərdə “Renn” ilə qarşılaşan “Marsel” favorit sayılırdı. Cənublular oyunun əvvəlində böyük ərazi üstünlüyünə malik idi. 31-ci dəqiqədə “Renn”in üç mərkəz müdafiəçisindən biri Budlyal birbaşa “qırmızı” ilə qovulandan sonra qonaqların qələbə qazanacağını düşünənlərin sayı artdı. Ancaq bretoniyalıların baş məşqçisi Həbib Beye belə duruma dərhal reaksiya verdi, gənc və istedadlı hücumçu Meyteni müdafiəçi Vu ilə əvəzlədi.

“Marsel” 2-ci hissə boyunca rəqib qapısına hücum etdi. 58-ci dəqiqədə Murilyonun baş zərbəsindən sonra top qapı çatından döndü. 66-cı dəqiqədə Balerdi də fərqlənməyə yaxın oldu. Bütün komanda ilə müdafiə olunan meydan sahibləri uzatma dəqiqələrində qələbə topunu vurdu. Beləcə “Marsel” mövsümə acı məğlubiyyətlə başladı.

“Havr”ı qəbul edən “Monako” yayda heyətini yetərincə gücləndirib. Qapını “Bayer-04”dən tanıdığımız Qradetski qoruyur, “Bavariya”dan Dayer alınıb, “Barsa”dan Fati icarəyə götürülüb, qalmaqalçı Poqba isə karyerasında yeni mərhələyə qədəm qoyub. İsti havaya rəğmən, komandalar bir-birinə yüksək temp təklif etdi. 32-ci dəqiqədə sağ cinahdan cərimə meydançasına daxil olan Qolovinin ötürməsini qarşılamaq istəyən Lyoris topu öz qapısına göndərdi. 61-ci dəqiqədə məhz Dayer fərqi artırdı. 6 dəqiqə sonra Ndiay qollardan birinin əvəzini çıxsa da, 74-cü dəqiqədə Akliuş “knyazlar”ı sevindirdi – 3:1.

“Tuluza”nı qəbul edən “Nitsa” gözlənilmədən 0:1 hesabıyla uduzdu. Yeganə qolu Sidibe 90-cı dəqiqədə vurdu. “Lion” səfərdə “Lans”ın öhdəsindən gəldi. “Şirlər”i Gürcüstan yığmasının hücumçusu Mikautadzü sevindirdi. “Strasbur” da səfərdə “Mets”i 1:0 hesabıyla məğlub etdi. “Oser” – “Loryan”, “Anje” – “Paris” oyunlarında da meydan sahibləri, artıq zənn etdiyiniz kimi, yeganə qolla qələbə qazandı.

Yalnız “Brest” – “Lill” oyunu qol sayı baxımından azarkeşləri əyləndirdi. “Şimallı itlər” oyunun gedişində 2:0 önə çıxsa da, meydan sahibləri hesabı bərabərləşdirməyi bacardı, ardından Mukau növbəti dəfə “Lill”i irəli çıxardı və yenə də Le Kardinal hesaba tarazlıq gətirdi. Yeri gəlmişkən, Jiru “Lill”dəki debüt oyununda fərqlənməyi bacardı. Məşhur forvard “Los Anceles”lə müqaviləni pozandan sonra azad agent statusu ilə ölkəsinin klubuna qoşulub.

1-ci tur
Nant – PSJ 0:1
Vitinya, 67. (34053)
PSJ: Şevalye, Zair-Emeri, Zabarnı, Beraldo, L.Ernandes (Mendeş, 61), Li Kan İn (Due, 61), Vitinya, Ruis (Hakimi, 61), Mbay (Dembele, 61), Ramuş (Kvaratsxeliya, 78), Barkolya.

Monako – Havr 3:1
Lyoris, 32-öz qapısına. Dayer, 61. Akliuş, 74 – Ndiay, 67. (11734)
Monako: Qradetski, Teze (Vanderson, 63), Mavissa, Dayer, Enrike, Zakariya, Kamara (Ben-Seqir, 63), Akliuş, Minamino (İlenihena, 81), Qolovin (Bamba, 89), Biret (Brunner, 81).

Renn – Marsel 1:0
Blyas, 90+1. (28360)
Marsel: Rulyi, İqan-Rayli, Balerdi, Kondoqbia (Vea, 46), Murilyo (U.Qarsiya, 78), Qomes (Bakola, 86), Heybyerq, Qrinvud, Rabyo, Rou (Obameyanq, 63), Quiri.

Lans – Lion 0:1
Mikautadze, 45+1. (38137)

Nitsa – Tuluza 0:1
Sidibe, 90. (23212)

Brest – Lill 3:3
Dumbiya, 34; 51. Le Kardinal, 75 – Jiru, 11. Haraldsson, 26. Mukau, 66. (14840)

Oser – Loryan 1:0
Sinayoko, 53. (16090)

Mets – Strasbur 0:1
Paniçelli, 86. (25009)

Anje – Paris 1:0
Lepol, 9. (12168)

Bombardir: Dumbiya (Brest) – 2.

Növbəti turun oyunları avqustun 22-24-ü aralığında keçiriləcək: PSJ – Anje, Marsel – Paris, Nitsa – Oser, Lion – Mets, Loryan – Renn, Havr – Lans, Strasbur – Nant, Tuluza – Brest, Lill – Monako.

Turun rəqəmi
800 – “Marsel”in elitadakı məğlubiyyətlərinin sayı bu həddə çatdı. “Marsel” Liqa 1 tarixinə bu qədər oyunda uduzan 9-cu komanda kimi düşdü.

Turun ulduzu
Kamori Dumbiya (Brest) – artıq 26-cı dəqiqədə 0:2 geridə olan komandasının məğlubiyyətdən qurtulması üçün əlindən gələni etdi. Malili yarımmüdafiəçi dubl etdi və dəfələrlə hücumçu yoldaşlarını zərbə mövqeyinə çıxardı.

Turun sitatı
İlya Zabarnı, PSJ-nin müdafiəçisi: