Yoahim Löv Asiyada işləməyəcək.

"Football-plus.az" xəbər verir ki. Almaniya yığmasının sabiq baş məşqçisi Özbəkistan yığmasını çalışdırmaq təklifini geri çevirib.

“Bild” qəzetinin məlumatına görə, Özbəkistan Futbol Assosiasiyası (ÖFA) 65 yaşlı mütəxəssislə danışıqlara başlamışdı. Löv bir neçə gün ərzində təklifi ciddi şəkildə nəzərdən keçirsə də, sonda nəzakətlə imtina edib. Tərəflər arasında növbəti görüş baş tutmayıb.

Xatırladaq ki, Özbəkistan yığması Timur Kapadzenin başçılığı altında tarixində ilk dəfə dünya çempionatına vəsiqə qazanıb. ÖFA rəhbərliyi komandaya DÇ-2026-nın final mərhələsində beynəlxalq təcrübəsi olan məşqçinin başçılıq etməsini istəyir.

Löv Almaniya yığmasının baş məşqçi vəzifəsində 2006-21-ci illərdə çalışıb. Bundestim onun rəhbərliyi altında 2014-cü ildə Braziliyada keçirilən dünya çempionatında və 2017-ci ildə Rusiyada baş tutan Konfederasiyalar Kubokunda qalib olub. Alman mütəxəssis 2021-ci ildən heç bir komandada işləməyib.