Avqustun 12-də Çempionlar Liqasının (ÇL) 3-cü təsnifat mərhələsinə yekun vuruldu.

"Football-plus.az" xəbər verir ki, cavab oyunları çərçivəsində növbəti 10 duel baş tutdu.

Ölkə reytinqinin yüksək olmasına görə mübarizəyə 2-ci təsnifat mərhələsindən başlayan “Qarabağ” “Şelburn”u (İrlandiya) hər iki matçda (3:0, 1:0) məğlub etmişdi. Azərbaycanın son çempionu favorit statusunu “Şkendiya” ilə oyunlarda da sübut etdi. Şimali Makedoniyada minimal hesabla qalib gələn “Qarabağ” Bakıda 5:1 hesablı qələbə ilə pley-offa adladı.

Ağdamlıların bu mərhələdəki potensial rəqibləri isə çərşənbə axşamı Macarıstanda cavab oyununa çıxdılar. “Ludoqorets” ilə “Ferentsvaroş” arasında Bolqarıstanda baş tutan ilk dueldə hesab açılmasa da, matç qonaqların aşkar üstünlüyü ilə yadda qalmışdı. Budapeştdəki həlledici oyun da yerli komandanın dominantlığı ilə keçdi. Robbi Kinin çalışdırdığı komanda qapıya 17, “Ludoqorets” isə 8 zərbə endirdi. Budapeştlilər dəqiq zərbələr üzrə rəqibini 6:4 hesabıyla üstələdilər. Top bir dəfə bolqarların qapı çarpazına və dirəyə dəydi. “Ferentsvaroş”un oyun planında üstünlüyü sonda 3:0 hesablı qələbə və pley-offa vəsiqə ilə təsdiqini tapdı. Beləliklə, “Qarabağ” pley-offda Macarıstanın çempionu ilə qarşılaşacaq. Yeri gəlmişkən, komandalar arasında ÇL-in 2022/23 mövsümünün 3-cü təsnifat mərhələsində baş tutan oyunların ümumi nəticəsi 4:2 hesabıyla ağdamlıların xeyrinə olmuşdu.

3-cü təsnifat mərhələsinin nəticəsinin postsovet məkanından olan komandalar üçün ümumilikdə yaxşı olduğunu qeyd edə bilərik. Bu mərhələdə çıxış edən sabiq ittifaqa daxil olan ölkələrin 3 təmsilçisindən ikisi pley-offa adladı. “Qarabağ” kimi “Kayrat” da rəqibi “Slovan”a qalib gəldi. Qazaxıstanın son çempionu evdə minimal hesabla üstün gəldiyi Slovakiya klubuna səfərdə uduzsa da, penalti seriyasında qələbəni təmin etdi. Lakin Kiyev “Dinamo”su məlum səbəbdən neytral meydanda keçirilən ilk oyunda minimal hesabla məğlub olduğu “Pafos”dan səfərdə iki cavabsız top buraxdı.

3-cü təsnifat mərhələsi, cavab oyunları
Ferentsvaroş (Macarıstan) - Ludoqorets (Bolqarıstan) 3:0 (ilk oyun - 0:0)
Varqa, 38; 79. Salai, 86.
Ferentsvaroş: Dibus, Qartenmann, Salai, Ramakers, Etveş (Levi, 88), Makretski, Kanixovski (Zaxariassen, 88), O’Dauda, Tot, Jozef (Qruber, 75), Varqa (Mayqa, 80).

QARABAĞ (AZƏRBAYCAN) - Şkendiya (Şimali Makedoniya) 5:1 (1:0)
Sake, 16-öz qapısına. K.Borges, 18. Axundzadə, 33. Yankoviç, 35-p. Leandro Andrade, 59 – Tamba, 10.
Slovan (Slovakiya) - Kayrat (Qazaxıstan) 1:0, p. - 3:4 (0:1)
Mak, 30.

Pafos (Cənubi Kipr) - Dinamo (Ukrayna) 2:0 (1:0)
Orşiç, 2. Korreya, 55.

Kopenhagen (Danimarka) - Malmö (İsveç) 5:0 (0:0)
Ueskas, 31. Robert, 43; 69. Elyunussi, 51. Mattsson, 67.

Viktoriya (Plzen, Çexiya) - Reyncers (Şotlandiya) 2:1 (0:3)
Durosinmi, 41. Markoviç, 83.

Brügge (Belçika) - Zaltsburq (Avstriya) 3:2 (1:0)
Seys, 61. Borxes, 83. Vanaken, 90+4 – Rasmussen, 18. Baydu, 42.

Srvena Zvezda (Serbiya) - Lex (Polşa) 1:1 (3:1)
Ndiaye, 45+1-p. - İşak, 90+3.

Fənərbaxça (Türkiyə) - Feyenoord (Niderland) 5:2 (1:2)
Braun, 44. Duran, 45+2. Fred, 55. Ən-Nəsiri, 83. Talişka, 90+6 – Vatanabe, 41; 89.

Benfika (Portuqaliya) - Nitsa (Fransa) 2:0 (2:0)
Eursnes, 19. Şelderup, 27.

İlk oyunları avqustun 19-20-də keçiriləcək pley-offda cütlər belə formalaşıb: Ferentsvaroş – QARABAĞ, Seltik (Şotlandiya) – Kayrat, Bude/Qlimt (Norveç) – Şturm (Avstriya), Srvena Zvezda – Pafos, Bazel (İsveçrə) – Kopenhagen, Fənərbaxça – Benfika (Portuqaliya), Brügge – Reyncers.