Məlum olduğu kimi, “Qarabağ” Çempionlar Liqasının 3-cü təsnifat mərhələsində “Şkendiya”nı mübarizədən kənarlaşdırsa, pley-offda “Ludoqorets” (Bolqarıstan) – “Ferentsvaroş” (Macarıstan) cütünün qalibiylə üz-üzə gələcək.

“Köhlən atlar” üçün qarşıdakı matçların əhəmiyyəti bəllidi: ilk dəfə 2017/18 mövsümündə Çempionlar Liqasının qrupuna düşən ağdamlılar bunu ikinci dəfə məhz bu mövsüm bacara bilər!

Bəs “Qarabağ”ın “Şkendiya”nı keçdiyini düşünsək, hansı potensial rəqiblə qarşılaşmaq ehtimalı böyükdü?

“Football-plus.az”ın məlumatına görə, bu komandalar arasında ilk oyun keçirilib.

“Ludoqorets”in meydanında keçirilən görüşdə qalib müəyyənləşməyib. Yenə də oyun haqda müəyyən məlumatlar sayəsində fikir sahibi ola bilərik. Odu ki, statistikayla tanış olaq.

8 (1) qapıya (“çərçivə”yə) zərbə 14 (2)
2 künc zərbəsi 10
1 ofsayd 3
12 qayda pozuntusu 14
1 (0) sarı (qırmızı) vərəqə 3 (0)
41 topa sahibolma (faizlə) 59

Göründüyü kimi, “Ferentsvaroş” üstün oyun göstərib. Düzdü, qonaqlar qayda pozuntularının və sarı vərəqələrin sayına görə da öndədi. Bununla belə, məhz macarlar topla daha çox vaxt keçirib, həm künc zərbələrinin, həm də qapı istiqamətində zərbələrin sayı da göstərir ki, “Ferentsvaroş” qələbəyə daha yaxın olub.

Maraqlıdı ki, “Ludoqorets”in mərkəz hücumçusu Bernard Tekpetey 46-cı, orta sahə oyunçularından Petar Ştaniçlə Filip Kaloç 64-cü dəqiqədə əvəzlənib. “Ferentsvaroş”da ilk əvəzetmə 72-ci dəqiqədə reallaşıb. Bu məqamlar da “Ludoqorets”in baş məşqçisi İqor Yoviçeviçin oyunun axarından narazı qaldığını göstərir.

Bütün deyilənlərdən sonra “Qarabağ”ın böyük ehtimalla məhz “Ferentsvaroş”la qarşılaşacağını proqnozlaşdıra bilərik.

KƏNAN BAHADIR