Çempionlar Liqasında 3-cü təsnifat mərhələsinin cavab oyunu ''Qarabağ'' kimi ''Fənərbaxça'' üçün də uğurlu alındı.

''Feyenoord''u qəbul edən İstanbul nəhəngi baş məşqçi Joze Mourinyonun söz verdiyi kimi fanatlarla birləşərək Kadıköydə rəqibinə əsil cəhənnəm yaşatdı. Özü də ''Qarabağ''dan fərqli olaraq ''Fənər'' səfərdə 1:2 məğlub olmuşdu və üstəlik evdə də 41-ci dəqiqədə qol buraxaraq ümumi hesabda 2 top geriyə düşdü. Amma ''sarı-lacivərdlilər'' möhtəşəm bir geridönüşə imza atdılar.

''Fənər'' hələ fasiləyə qədər yeni transferlər - Arçi Braun və Con Duranın qolları ilə hesabda önə keçməyi bacardı. İkinci hissənin əvvəllərində Fredin qolu ilə durum 3:1-ə gəldi və meydan sahibləri artıq ümumi hesabda da önə keçdilər. Matçın son anlarında Yussef Ən-Nəsiri səhnəyə çıxaraq hesabı darmadağın həddinə çatdırdı.

İkinci hissəyə əlavə olunmuş dəqiqələrdə fanatlar daha iki qol izlədi. Niderland nəhəngi fərqi 2 topa endirərək qısa müddətə intriqanı bərpa etsə də, komandanın bundan artığına gücü çatmadı. Son nöqtəni Anderson Talişka qoydu. Beləliklə, 5:2 hesablə mükəmməl qələbə qazanan Mourinyonun komandası adını pley-offa yazdırdı.

Maraqlıdı ki, ''Fənərbaxça''nın avrokuboklarda təmsilçilərini ən çox (10 dəfə) məğlub etdiyi ölkə Niderlanddısa, Mourinyo da avrokuboklarda Niderland təmsilçilərini ən çox (11 dəfə) məğlub edən məşqçidi. İstanbul nəhəngi həm də avrokuboklarda 27 ildən sonra bir ilki rəsmiləşdirdi. Komandanın təsnifatlar da daxil olmaqla avrokubokların pley-offunda səfərdə uduzduqdan sonra mərhələ adlanmasına daha öncə yalnız 1998-ci ildə rast gəlinmişdi. O vaxt ''Fənər'' bu uğuru UEFA kubokunun 2-ci təsnifat mərhələsində ''Göteborq'' ilə dueldə (səfərdə 1:2, evdə 1:0) yaşamışdı.