''Fənərbaxça'' Portuqaliya toplanışını başa vurub.

"Football-plus.az" xəbər verir ki, toplanışın 4-cü və sonuncu oyununda İstanbul nəhəngi ''Benfika'' ilə qarşılaşıb.

''Da Luj'' stadionunda keçirilən və formal xarakter daşıyan ''Eysebio Kuboku'' çərçivəsində baş tutan oyunu 55 mindən çox azarkeş izləyib. Joze Mourinyo komandasını bu heyətlə meydana buraxıb: Livakoviç, Mərt Müldür, Çağlar Söyüncü, Oostervolde, Braun, Fred Amrabat, İrfan Can Kahveci, Şimanski, Oğuz Aydın, Ən-Nəsiri.

Fasilədə, eləcə də ikinci hissənin gedişində bu futbolçular meydana çıxıb: İrfan Can Eğribayat, Duran, Yusuf Akçiçək, Ciku, Bartuğ Elmaz, Levent Mercan, Mimoviç, Cenk Tosun.

Hesabı ''Benfika''nın türkiyəli ulduzu Kərəm Aktürkoğlu açıb. ''Qalatasaray''ın sabiq üzvü 37-ci dəqiqədə ''Fənər''li müdafiəçilərin mövqe səhvindən istifadə edərək qapıçı ilə təkbətək dueldən qalib ayrılıb. Lissabon nəhəngi çox keçmədən fərqi iki topa yüksəldib. Bu dəfə yeni transfer Arçi Braun avtoqol müəllifi olub. Sonrakı dəqiqələrdə fəallaşan ''Fənər'' hələ fasiləyə qədər qollardan birinin əvəzini çıxıb. İrfan Can Kahveci yerlə topu qapıçı üçün əlçatmaz nöqtəyə göndərib.

Bir saatın tamamında isə Ən-Nəsiri qapıçı ilə təkbətək çıxdığı epizodda fürsəti boşa verməyib. Amma son sözü meydan sahibləri söyləyib. 81-ci dəqiqədə standard zərbə zamanı Otamendinin başla qapı önünə göndərdiyi topu Arauxo bir toxunuşla tora göndərib. Bütün oyun ərzində olduğu kimi bu epizodda da ''sarı-lacivərdlilər''in müdafiə xətti inamsız təsir bağışlayıb.

Beləliklə, ''Fənər'' bu yay ilk dəfə yoxlama oyununda məğlub olub. Komanda daha öncə İstanbulda ''Fatih Karagümrük''lə 2:2 bərabərə qalmış, Portuqaliyada isə ilk 3 matçda ''Portimonense''ni 2:1, ''Uniao Leyriya''nı 2:0, ''Əl-İttihad''ı 4:0 məğlub etmişdi.

Bu gün İstanbula qayıdan ''Fənər'' iyulun 30-da ''Latsio'' ilə yoxlama matçında qarşılaşacaq. Avqustun 5-də isə komandanı Çempionlar Liqasının 3-cü təsnifat mərhələsində səfərdə ''Feyenoord''a qarşı oyun gözləyir.