“Portu”nun sabiq kapitanı Jorje Koşta 54 yaşında vəfat edib.

Futbolçu karyerasının böyük hissəsini “Portu”da keçirən Koşta bu klubun yetirməsi olub. O, 1990-2005-ci illərdə Portuqaliya klubunun heyətində çıxış edib və uzun müddət komandanın kapitanı olub.

Sabiq müdafiəçi “Portu” ilə 8 dəfə Portuqaliya çempionu, 5 dəfə ölkə kubokunun, 8 dəfə ölkə superkubokunun sahibi olub. O, həmçinin Çempionlar Liqasının, UEFA Kubokunun və Qitələrarası Kubokun qalibi olub. Karyerası ərzində “Penafyel”, “Maritimu” və “Çarlton”da icarə əsasında çıxış edən Koşta peşəkar futbolçu karyerasını “Standard”da başa vurub.

O, məşqçi kimi ÇFR-i 2011/12 mövsümündə Rumıniya çempionu edib.