Xatırlayırsızsa, hakimlərimiz üçün yay təlim-məşq toplanışının keçiriləcəyi vaxtın bəlli olduğunu, ədalət təmsilçilərinin yeni mövsüm üçün hazırlıq prosesinin iyulun sonu – avqustun əvvəlini əhatə edəcəyini yazmışdıq. Onu da bildirmişdik ki, toplanış Bakıda baş tutacaq.

“Football-plus.az” xəbər verir ki, prosesə artıq start verilib. Bu barədə saytımıza AFFA-nın İnformasiya və İctimaiyyətlə Əlaqələr Departamentinin rəhbəri Elnur Məmmədli məlumat verib. Onun sözlərinə görə, hakimlər bu gün Hakimlər Komitəsinin sədri Frank De Blekerenin rəhbərliyi altında Mərdəkanda yerləşən “Dalğa Arena”da məşqlərə başlayıb.

Bu arada Elnur bəydən toplanışda yeni ədalət təmsilçilərinin olub-olmadığını da soruşduq. Axı premyer-liqada iştirak edən komandaların sayı artdığından buna ehtiyac var. AFFA rəsmisi bildirdi ki, bu haqda ətraflı məlumat və hakimlərin siyahısı ən qısa zamanda açıqlanacaq.

KƏNAN BAHADIR