Bazar günü Bakı Tennis Akademiyasının yan-yörəsindən keçən hər kəs, yəqin ki, içəridən gələn uğultunun fərqinə vardı.

Yox, minifutbol yığmamız beynəlxalq oyun keçirmirdi. Budəfəki qələbəliyin səbəbi başqa idi. Meydana ölkə futbolunun ulduz veteranları və idman jurnalistikasının ulduzları çıxmışdı. Milli Mətbuatın yaranmasının 150 illiyinə həsr olunan bu oyunun təşkilatçılarını da xatırladandan sonra, necə deyərlər, bədii hissəyə keçmək istəyirəm. “Etopaz” baş sponsor idi, Milli Olimpiya Komitəsi, Azərbaycan Minifutbol Federasiyası və Azərbaycan İdman Jurnalistləri Assosiasiyası (AİJA) da təşkilatçılar. AİJA-nın rəhbərlərindən Natiq Nəsirov və Anar Şabanoğlu tədbirin möhtəşəm alınması üçün əlindən gələni etmişdi. Tribunalarda müəyyən azarkeş ordusu da var idi ki, onlar da əsasən jurnalistləri dəstəkləyirdi.

Son illərdə futbol veteranları, adətən, jurnalistlərə böyük hesabla qalib gəlir. Bəzən hətta meydanda bərabər mübarizə getməsi üçün komandalarda oyunçu sayı fərqli olur. Amma bu dəfə bizim bayram idi, meydana çıxan jurnalist-futbolçular ən azı yubiley naminə bütün gücünü meydanda qoyacağına and içmişdi. Təbii, sizi maraqlandıran suallardan biri də bu olacaq ki, bəs veteranlar yığmasının heyətində kimlər var idi? Burda nə var ki, deyim də: Samir Ələkbərov, Mahmud Qurbanov, Nadir Şükürov, Vaqif Cavadov, Elxan Abdullayev, Azər Bağırov, Azər Mehdiyev, Əli Abışov, Ədəhim Niftəliyev, Tərlan Əhmədov, Emin Quliyev, Zaur İsmayılov.

Jurnalistlər yığmasının baş məşqçisi Mahir Rüstəmli isə meydana bu start heyətini buraxdı: Mərdan Həsənov, Emin Abbasov, Xanoğlan İmanov, Nirani İsgəndərov, Mirbağırağa Cəfərli, Məsim Məsimzadə.

Bu gün ölkədə ən yaxşı futbol oynayan jurnalistlərin əksəri meydanda idi. Və bu gediş özünü doğrultdu. Jurnalistlər meydanda rahat oynayır, veteranları arsenalındakı bütün fəndləri işlətməyə məcbur edirdi. Təsadüfi deyil ki, bir neçə dəfə hesabda önə çıxmağı da bacardıq. Sonda qeydə alınan 7:7 hesabı sizi yanıltmasın. Bəli, belə yubiley oyunlarının heç-heçə bitməsi adi hal alıb. Ancaq bu dəfə tərəflərin bir-birinə güzəşt getmək fikri yox idi. İlk yarı 20 dəqiqə, ikinci yarı isə 25 dəqiqə əvəzinə 30 dəqiqə davam etdi. İş ondadı ki, oyunu idarə edən Sabir Hacıyev veteranların məğlubiyyətdən qurtulması üçün əlindən gələni əsirgəmədi. Komandaları artıq oynatması azmış kimi, bəzi şübhəli, rəqibin xeyrinə olan qərarlar da verdi. Sadəcə, biz jurnalistlər günün və oyunun bayram ab-havasına xələl gətirmək, söz-söhbət yaratmaq istəmədik. Yoxsa oyunun normal vaxtı jurnalistlər yığmasının 7:5 hesablı qələbəsiylə bitmişdi. Veteranlar necə qəzəblənmişdilərsə, bir-birini acılamaqdan da çəkinmirdilər. Hətta Mahmud Qurbanov oyundan sonra Mahir Rüstəmliyə yaxınlaşaraq, jurnalistlər yığmasının belə inamlı oyununun səbəbini soruşdu, cavab görüşü keçirməyi təklif etdi. Çox güman, yaxın vaxtlarda belə bir görüş təşkil olunacaq.

Sonda yenə qayıdaq rəsmi hissəyə. Oyun bitəndən sonra AİJA prezidenti Eldar İsmayılov və “Olimpiya dünyası” qəzetinin baş redaktoru Aslan Şirəliyev iştirakçılara Milli Mətbuatın 150 və AİJA-nın 30 illik yubileyi münasibəti ilə hazırlanmış xatirə medalları və başqa hədiyyələr təqdim etdi. Tədbir qeyri-formal şəraitdə - çay süftəsi arxasında davam etdi, hər kəs təşkilatçılara minnətdarlığını bildirdi və ...dağılışdıq. Əsas odu ki, yubiley günündə veteranlara uduzmadıq!

ORXAN