“Şamaxı”nın heyətində qol vuran bu futbolçunun müqaviləsi “Qəbələ”yə aiddi – klubdan açıqlama
Yoxlama görüşündə “Karvan”la qarşılaşan “Şamaxı”nın heyətində bir məqam gözdən qaçmayıb.
Belə ki, “şirlər”in start heyətində meydana çıxan, hətta hesabı açan futbolçu Abdullahi Şuaybu oldu. Axı bu futbolçu “Qəbələ”yə məxsusdu. Nə “Qəbələ”dən ayrılması, nə də “Şamaxı”ya gəlişi ilə bağlı məlumat var.
“Football-plus.az” məsələni dəqiqləşdirmək üçün “Şamaxı”nın idman direktoru Kamran İsmayılovla əlaqə saxlayıb:
“Şuaybu “Şamaxı”da baxışdadı. Bəli, bizlə məşq edir, yoxlama oyununda qol da vurub. “Qəbələ” ilə danışmışıq ki, Şuaybunu bəyənsək, şəxsi razılıq əldə etsək, heyətimizə qatacağıq. Bu barədə onlarla şifahi razılıq əldə etmişik. Hələ ki o baxışdadı. Buna biz qərar verəcəyik – Şuaybu “Şamaxı”da qalsın, ya yox. Hazırda Şuaybu ilə heç bir müqaviləmiz yoxdu”.
MÜZƏFFƏR QULUZADƏ
