Avropada bu yay transfer dönəminin ən çox müzakirə olunan isimlərindən biri ''Sportinq''li Viktor Dyokereşdi.

Heç kimə sirr deyil ki, bu forvarda ən çox maraq göstərən klub ''Arsenal''dı. İki klub arasında uzun müddətdi, danışıqlar davam edir. Amma bu transfer yavaş-yavaş Viktor Osimhenin ''Napoli''dən ''Qalatasaray''a keçidi kimi ''sabun operası''na çevrilməyə başlayır. ''Napoli'' prezidenti Auerlio De Laurentisin bilərəkdən məsələni uzatması kimi ''Sportinq'' prezidenti Frederiko Varandaş da transferə mane olmaq üçün əlindən gələni edir.

''Maisfutebol'' saytının xəbərinə görə son danışıqların ardından Dyokereşin atası artıq onun ''Arsenal''a keçidinə olan inamını itirdiyi üçün cümə günü göz yaşlarını saxlaya bilməyib. Hazırda tərəflər arasında əsas problemli mövzu bonuslardı. Londonlular maksimum 5 milyon avro həcmində bonus təklif edirlərsə, lissabonlular 10 milyon avroluq bonus tələb edirlər.

İddialara görə Dyokereşin türkiyəli meneceri Hasan Çetinkaya hətta bu transferin baş tutması üçün özünə çatmalı olan məbləğdən də imtina edib! ''Sportinq'' rəhbərliyinin fikrincə, isveçli forvardın atasının göz yaşları sadəcə bir strategiyadı və bu hərəkət klub üzərində təzyiq yaratmağa yönəlib. 27 yaşlı futbolçunun ''Sportinq'' ilə hələ üçillik müqaviləsi olsa da, o artıq bu klubda oynamaq istəmir və bir həftədən çoxdu ki, məşqlərə çıxmır.

Dyokereş ötən mövsüm ''Sportinq''də 52 rəsmi oyunda 54 qol, 13 məhsuldar ötürməlik tarixi bir performans ortaya qoymuşdu.