Portuqaliya çempionatının 30-cu turunda çempionluğa iki əsas namizəddən biri olan ''Sportinq'' ''Moreyrense''ni qəbul etdi.

''Football-plus.az'' xəbər verir ki, Lissabon nəhəngi əsas qol silahı Viktor Dyokereşin sayəsində 3:1 hesablı qələbə qazandı. Het-trik edən İsveç yığmasının üzvü bu mövsüm inanılmaz məhsuldarlıq sərgiləməkdə davam edir.

2023-cü ildə 24 milyon avroya ''Koventri''dən transfer olunan və ilk mövsümdə ''Sportinq''in heyətində 43 qol, 15 məhsuldar ötürmə ilə 58 qolun vurulmasında yaxından iştirak edən 26 yaşlı futbolçu bu mövsüm də bu inanılmaz göstəricisini indidən təkrarlamağa müvəffəq olub.

2024/25-də Dyokereş ''Sportinq''də 46 rəsmi oyunda 47 qol, 11 məhsuldar ötürməlik performans sərgiləyib. Yığma komandanı da nəzərə alsaq, onun qolları 56-ya yüksəlir. Dyokereş bu mövsüm yığma və klub karyerasında 6-cı dəfə bir oyuna ən azı 3 top vurdu! O, daha öncə ''Gimaraynş'', ''Farense'' və ''Mançester Siti'' ilə oyunlarda het-trik, ''Eştrela'', eləcə də yığmamıza qarşı oyunda isə poker etmişdi!

Qeyri-adi bir şey baş verməsə, bu futbolçu bu yay Portuqaliyanı tərk edəcək. Ona İngiltərə təmsilçiləri - ''Çelsi'', ''Mançester Siti'' və xüsusilə də ''Arsenal'' ciddi maraq göstərir. Dyokereşin ''Sportinq'' ilə müqaviləsi 2028-ci ilə qədərdi. Onun sərbəst qalma maddəsi 100 milyon avro idi. Amma Portuqaliya mətbuatının iddiasına görə Dyokereş rəhbərliklə anlaşaraq bu məbləği 75-80 milyon avro səviyyəsinə endirməyə müvəffəq olub. Yəni yayda onun keçidini 80 milyon avroya tamamlamaq mümkün olacaq.

Mərkəz hücumçusu ilə bağlı ciddi problemlər yaşayan ''Arsenal''ın lissabonlulara məhz bu məbləği təklif edəcəyi gözlənilir. Dyokereşin ümumilikdə ''Sportinq''də forma geydiyi 96 rəsmi qarşılaşmada 90 qol, 26 məhsuldar ötürməlik mükəmməl bir performans ortaya qoyduğunu bildirək.