''Fənərbaxça''nın sabiq futbolçusu, hazırda karyerasını İran təmsilçisi ''Persepolis''də davam etdirən Sərdar Dursun ikinci dəfə ata olub.

"Football-plus.az" xəbər verir ki, türkiyəli forvard ilə həyat yoldaşı Yasemin Dursunun Elanur adını verdikləri qızları dünyaya göz açıb. Sərdar 1,2 milyon təqibçisi olan ''instaqram'' səhifəsinin hekayə bölümündə doğuşdan sonrakı duyğusal və özəl şəkilləri paylaşıb.

Onun paylaşımları arasında ən diqqətçəkən şəkil isə yerə yıxıldığı an olub. Sən demə doğuşdan bir müddət sonra Dursun huşunu itirərək yerə yıxılıbmış. Həkimlərin müdaxiləsindən sonra o özünə gəlib. Onun yerdə yıxılı vəziyyətdə şəklini həyat yoldaşı da öz səhifəsində paylaşıb.

Yasemin Dursun zarafatca şəkilin üzərinə ''nə vaxt ki, huşunu itirdi, mən rahatladım'' ifadəsini yazıb. Ananın doğuş vaxtı güclü duruşu, atanın isə əksinə duyğusal anlar yaşaması marağa səbəb olub.

Elanurun sağlam və problemsiz doğulduğu qeyd olunur. Təqibçilər cütlüyə xoş sözlər və təbrik mesajları göndəriblər.