İran çempionatının 21-ci turunda İsmayıl Kartalın çalışdırdığı ''Persepolis'' ''İstiqlal''ı qəbul edib.

''Football-plus.az'' xəbər verir ki, son 3 rəsmi oyunda qələbəyə həsrət qalan Tehran təmsilçisi nəhayət, uğursuzluq zolağından çıxmağa müvəffəq olub. Meydan sahibləri 2:1 hesabı ilə üstün olublar. Qarşılaşmanın ən diqqətçəkən epizodu fasilə ərəfəsində yaşanıb.

''Persepolis''in qazandığı penalti zamanı topun başına Sərdar Dursun keçib. Türkiyəli forvardın zərbəsini qonaqların qapıçısı Səid Hosseyni dəf etməyi bacarıb. Amma hakim qapıçının zərbədən öncə qapı xəttindən irəli çıxdığına işarə vuraraq penaltinin təkrar vurulmasını tələb edib. Sərdar yenə topu əlinə götürərək zərbəni vurmaq istədiyini göstərib. Amma bu məqamda ona Hossein Kənani etiraz edib. Təcrübəli mərkəz müdafiəçisi Dursunun zərbəni vurmasına mane olub və özü topun başına keçib.

Kənani fürsəti boşa verməyərək komandasını hesabda önə keçirib. Sərdar Dursunun komanda yoldaşının bu hərəkətindən bir qədər şoka düşdüyü hiss olunsa da, o bunu biruzə verməməyə çalışaraq oyunu davam etdirib.

Daha öncə İsmayıl Kartalın başçılığı altında ''Fənərbaxça''da da top qovmuş 33 yaşlı forvard hələ ki, İran karyerasında 5 rəsmi oyuna yalnız 1 qol vurub. Kartalın başçılığı altında 7 rəsmi oyunda cəmi 2 qələbəsi olan ''Persepolis'' 21 tura topladığı 41 xalla 3-cü pillədədi və lider ''Traktor''dan 4 xal geridədi.

ƏLİ