Məlum olduğu iyulun 17-də yoxlama oyunu çərçivəsində ''Araz-Naxçıvan''la ''Trabzonspor'' üz-üzə gəlmişdi. Ərzurum şəhərində keçirilən görüşdə təmsilçimiz 3:2 hesabı ilə üstün olmuşdu. İyunun sonlarında ''Trabzonspor''a rəsmən geri dönən Pol Onuaçu bu oyunda zədələnərək 38-ci dəqiqədə əvəzlənmişdi.

"Football-plus.az" xəbər verir ki, trabzonlu fanatların sevimlisi olan bu futbolçunun durumuna aydınlıq gəlib. Sol ayaq topuğundan zədə alan Onuaçu ən azı 4 həftəliyə sıradan çıxıb! Bu da o deməkdi ki, təcrübəli forvard hazırlıq dönəminin böyük hissəsini buraxacaq. Onun ilk turda meydana çıxması sual altındadı.

Xatırladaq ki, 201 sm boya malik olan nigeriyalı hücumçu 2023/24-də icarə əsasında ''Trabzonspor''da oynamış və 25 qarşılaşmada 17 qol vurmaqla iz buraxmağı bacarmışdı.

Ötən mövsümü müqavilə ilə məxsus olduğu ''Sauthempton''da keçirən 31 yaşlı futbolçu ''Trabzonspor''un israrından sonra bu yay böyük ümidlərlə komandaya qayıtdı. Amma göründüyü kimi o, ikinci dönəmində rəsmi oyuna çıxmadan zədələndi.