''Latsio''nun köhnə-yeni baş məşqçisi Mauritsio Sarrinin səhhətində problem yaranıb.

"Football-plus.az" xəbər verir ki, təcrübəli mütəxəssis təcili olaraq Romada yerləşən ''Villa Mafalda'' xəstəxanasına yerləşdirilib.

Yerli mənbələrin yaydığı xəbərə görə 66 yaşlı çalışdırıcı səhər məşqini buraxmalı olub. O, ürəyindəki sancılar və ağrılar üzündən xəstəxanaya yollanıb.

Sarrinin ürəyi ilə bağlı problem yeni durum deyil. Siqaretə olan aludəçiliyi ilə tanınan məşqçi pnevmoniya və koronavirus keçirdikdən sonra ürəyində tez-tez problemlər başlayıb. ''Latsio''nun son açıqlamasında məşqçinin tibbi müayinədən keçdiyi və xəstəxanadan evə buraxıldığı qeyd olunub.

Xatırladaq ki, bu, Sarrinin paytaxt təmsilçisində ikinci dönəmidi. Daha öncə 2021-24-cü illərdə bu klubda işləmiş italiyalı mütəxəssis ötən ayın əvvəllərində yenidən bu kluba qayıtmışdı. Sarri ''Latsio'' ilə indiyə qədər heç nə qazanmasa da, ''Çelsi'' ilə Avropa Liqasını, ''Yuventus'' ilə A seriyasını qazanıb.

Yeri gəlmişkən, ''Latsio'' ayın axırında Türkiyə turnesinə yollanacaq. Romalılar iyulun 30-da ''Fənərbaxça'', avqustun 2-də isə ''Qalatasaray''a qarşı yoxlama oyunu keçirəcəklər.