Mauritsio Sarri qeyri-adi açıqlamalar verməkdə davam edir.

Hazırda ''Latsio''nu çalışdıran təcrübəli mütəxəssis ötən ayın əvvəllərində sıx təqvimdən gileylənmiş, artıq futboldan zövq almadığını qeyd etmiş və məşqçiliklə vidalaşacağını istisna etməmişdi.

Bu dəfə Sarri İngiltərənin ''San'' nəşrinə maraqlı bir etiraf edib. O, 2019-da İngiltərədən ayrılaraq İtaliyaya qayıtmaqla səhvə yol verdiyini bildirib. 64 yaşlı çalışdırıcı 2018/19-da ''Çelsi''ni çalışdırmışdı. Həmin mövsüm London təmsilçisi paytaxtımızda keçirilən Avropa Liqasının finalında ''Arsenal''ı yenmişdi. Buna baxmayaraq Sarri 2019-da İtaliyaya qayıdaraq ''Yuventus''un başına keçmişdi. Burdakı macərası da bir il çəkən məşqçi 2021-dən bu yana ''Latsio''nun başındadı.

Bundan başqa Sarri ''Səudiyyə Ərəbistanında işləməyə razı olarsızmı'' sualına ''siqaret çəkməyə qadağa yoxdusa, bir gün gedib orda işləyəcəyimi istisna etmirəm'' cavabını verib. Siqaretə meyli ilə tanınan mütəxəssis günə ən az 60 siqaret çəkir. Hətta deyilənə görə Sarri işlədiyi klublarda ətrafdakıların siqaretin tüstüsündən əziyyət çəkməməsi üçün özünə kiçik bir otaq quraşdırılmasını tələb edir.

ƏLİ