Yay “transfer pəncərəsi”nin qızğın çağıdı, İngiltərə premyer-liqasında çıxış edən klublar yenə də bazarın ən fəal oyunçularındandı.

"Football-plus.az" xəbər verir ki, “Liverpul” 200 milyondan artıq xərcləyib, “Mançester Siti” və “Çelsi” 100 milyon həddini keçib, “Mançester Yunayted”lə “Tottenhem” də bu rəqəmə yaxınlaşmaqdadı.

Hər komandanın qapamağa çalışdığı zəif tərəfləri var. Bəziləri bu prosesdə öz aralarında rəqabət aparmağa məcburdu. Ənənəvi olaraq “top-6” adlandırılan qrupda yer alan klubların hər birinin, eləcə də Çempionlar Liqasında çıxış edəcək “Nyukasl”ın hansı mövqelər üzrə güclənməyə ehtiyac duyduğuna nəzər yetirək.

“Liverpul” – mərkəz hücumçusu, mərkəz müdafiəçisi
Premyer-liqanın çempionu yaya maksimal dərəcədə ambisiyalı başladı: artıq Florian Virts, Ceremi Frimponq və Miloş Kerkezin transferləri təsdiqlənib, bu üçünün keçidinə 200 milyon avrodan artıq pul xərclənib. Ancaq Arne Slotun komandası bununla kifayətlənmək istəmir: açıq-aydın bəyan olunur ki, satış dalğasından sonra hücumçu və mərkəz müdafiəçisi alınacaq.

Hücumçu mövqeyinə arzulanan əsas şəxs Aleksandr İsakdı. “Qırmızılar” isveçli hücumçuya görə hətta Virtslə müqayisədə daha artıq pul xərcləməyə hazırdı. Ancaq belə görünür ki, “Nyukasl” onu buraxmaq fikrində deyil. İsakla yanaşı, Ekitikenin də adı çəkilir. Hətta siyahıda Osimhen də var idi, ancaq o, “Qalatasaray”da qaldı. Müdafiənin mərkəzini gücləndirməyə əsas namizdə “Kristal Pelas”dan Mark Qehidi.

“Arsenal” – sol vinger, mərkəz hücumçusu
“Liverpul”un fonunda “Arsenal”ın yay keçidləri müəyyən mənada “dişsiz” görünür. “Topçular” öz tempinə sadiqdi, hələ ki meydanın dərinlikləri üçün transfer edir: Kepa Arrisabalaqa lə Kristian Nerqorun alınmasını “belə oyunçular da lazımdı” məntiqi ilə izah etmək olar. İyulun 6-da Martin Subimendinin keçidi təsdiqləndi, bununla da orta sahə ilə bağlı problem həll olundu.

Bundan sonra londonlular hücuma fokuslanacaq. Güclü bir forvard hava-su kimi lazımdı. Viktor Dyökereş və Benyamin Şeşko ilə bağlı şayiələr sürətlə bir-birini əvəz edir. Paralel şəkildə vinger axtarışı da gedir ki, Martinelli ilə rəqabət apara və ya braziliyalı satılarsa, onu əvəz edə bilsin. “Topçular” “Real”dan Rodriqonu arzulayır, ancaq “Kristal Pelas”dan Ebereçi Ezenin alınması daha real variantdı.

“Mançester Siti” – sağ cinah müdafiəçisi
“Siti” Şerki, Reynders və Ait-Nurini “rənglərinə bağlamaqla” yay transfer kampaniyasının əsas hissəsini klublarası dünya çempionatına qədər həyata keçirmişdi. Üstəlik 250 milyon avroluq (Marmuş, Niko Qonsales, Xusanov, Reys) qış bazarlığını da unutmayaq. İndi yalnız nöqtəvi transfer lazımdı ki, əsas prioritet sağ cinah müdafiəçisi mövqeyidi.

Qvardiola ideal namizəd kimi “Nyukasl”dan Tino Livramentonu seçib, ancaq “sağsağanlar”la danışıqlar hədsiz ağır gedir. “Siti”nin ehtiyac duyduğu oyunçu profili aydındı: sürətli, fiziki cəhətdən möhkəm cinah oyunçusu ki, həm hücuma yardım etsin, həm də müdafiədə boşluqlar buraxmasın. Gənc Kayl Uoker bu meyarlara tam uyğun gələrdi, ancaq indi bazarda belə oyunçu yoxdu.

“Çelsi” – ehtiyat sol müdafiəçi
Hər kəs indi bu sualı verir ki, bu qədər oyunçu “Çelsi”nin nəyinə lazımdı? “Çelsi” isə sanki “daha hansı oyunçuları alım” sualı üzərində düşünür. Joao Pedronun alınması, Ceymi Gittenslə sövdələşmənin gerçəkləşmək üzrə olması adama bu fikri təlqin edir. İndi hücum xəttindəki üç mövqe üçün Cekson, Delap, Neto, Madueke, Pedro, Corc və Estevao var, həmçinin Koul Palmeri də unutmayaq. KDÇ-dən sonra Gittens də komandaya qoşulmalıdı. Odu ki, hücum dolub-daşır.

Londonlulara yalnız Mark Kukurelyanın əvəzedicisi kimi ehtiyat sol müdafiəçi lazımdı. Onları “bazara çəkən” yeganə mövqe budu.

“Nyukasl” – sağ vinger, universal forvard
“Transfer pəncərəsi” “sağsağanlar” üçün hədsiz çətin alınır: onların hədəfləri rəqibləri seçir (Pedro “Çelsi”yə, Mbeumo MY-yə getdi), rəqiblər isə yüksək məbləğ qarşılığında belə oyunçularını satmaqdan imtina edirlər (“Nottingem Forest” Elanqanı 50 milyon funta buraxmadı). Bununla belə, bu şərtlər altında da ÇL üçün güclənmək vacibdi.

Gücləndiriləsi əsas mövqe sağ vingerdi. Qordon, İsak və keyfiyyətli üçüncü oyunçudan ibarət hücum xətti nəinki premyer-liqada, hətta Avropada da təhlükə saça bilər. “Nottingem”lə anlaşmaq mümkün olsa, Elanqa əla variantdı, ancaq PSV-dən Yoan Bakayoko kimi alternativ variant da nəzərdən keçirilir.

“Mançester Yunayted” – mərkəz hücumçusu, universal forvard
Heylunn ilə Zirkzenin son iki ildə transfer olunmasına baxmayaraq, mərkəz hücumçusu mövqeyinin güclənməsinə yenə də ehtiyac var. Dyökereş, Ekitike – bu oyunçular klubun “radarına düşüb”. Bir qədər az maraq doğuran variantlar da var: Moyze Kin, Jan-Filipp Mateta, Samu Aqehova.
O da aydındı ki, Ruben Amorim komandasında mümkün qədər çox universal futbolçu görmək istəyir, xüsusən də hücum xəttində. Məhz buna görə klubun növbəti transferi, yəqin ki, “Brentford”dan Brayan Mbeumo olacaq. O, lazım gələrsə, hücum xəttinin istənilən yerində oynaya bilər.

“Tottenhem” – universal vinger
Tomas Frank “sükan arxasına” keçəndən dərhal sonra rəhbərliyə Mbeumo uğrunda MY və “Nyukasl” ilə mübarizəyə qoşulmaq tapşırığını verdi. Ancaq bu mübarizə “mahmızlar” üçün uğursuz bitdi. Hər halda, onların axtardığı oyunçu profili aydındı. Xüsusən də Son Hın Minin qeyri-müəyyən gələcəyi fonunda. Ebereçi Eze, Məhəmməd Kudus, Antuan Semenyo – bütün bu oyunçuların formatı eynidi. Bunlardan biri “mahmızlar”ın heyətində görünəcək.