''İnter''in türkiyəli ulduzu Hakan Çalhanoğlu ilə bağlı Türkiyə mətbuatında olduqca sürpriz bir iddia ortaya atılıb.

Belə ki, ''Fənərbaxça'' onun uğrunda mübarizəyə qoşulub. Özü də danışıqlar prosesində birbaşa prezident Əli Koç özü iştirak edir!

Məlum olduğu kimi Türkiyə yığmasının kapitanının bir müddət öncə ''Qalatasaray''a keçmək ehtimalı yaranmışdı. Ümumiyyətlə, təcrübəli futbolçu uşaqlıqdan ''Cim-Bom'' azarkeşi olduğunu heç vaxt inkar etməyib. Ancaq ''sarı-qırmızılar''ın 15 milyon avrodan artıq ödəmək istəməməsi, ''İnter''in isə minimum 30 milyon avro tələb etməsi üzündən bu transfer baş tutmamışdı. Sonradan ''Qalatasaray'' məsələsi gündəmdən düşdü və Hakan ''İnter''in toplanışına qoşuldu. Ona görə də ''Fənər''in birdən-birə ortaya çıxması və Çalhanoğlu ilə danışıqlar aparması çoxlarını təəccübləndirdi.

İddialara görə Əli Koç ''İnter''ə 20 milyon avro təklif edib. Amma milanlılar ''Qalatasaray''dan olduğu kimi ''Fənər''dən də 30 milyon avro tələb ediblər. Hazırda Koç bu məbləği bir qədər aşağı salmaq və qarşı tərəflə ortaq məxrəcə gələ bilmək üçün danışıqları davam etdirir. Mourinyonun yaxın dostlarından birinin Hakanın və yanında da qum saatının şəklini paylaşması fanatları həyəcanlandırıb. Şayiələrə inansaq, Koç Çalhanoğluya ''10'' nömrəli forma və kapitan sarğısını təklif edib.

O, 31 yaşlı futbolçudan ''Fənərbaxça''ya gəlmək istərdinmi'' sualını soruşduqda Hakan ''Türkiyəyə qayıtmaq arzusundayam, klubumla anlaşsaz, mən tərəfdən problem yoxdu'' cavabını verib.