Kriştiano Ronaldolu ''Əl-Nəssr'' yeni mövsümə çox ciddi hazırlaşır və çempionluq həsrətinə son qoymaq istəyir.

"Football-plus.az" xəbər verir ki, məhz bu məqsədlə baş məşqçi postuna tanınmış mütəxəssis Jorje Jezuş gətirilib. Portuqaliyalı məşqçi son olaraq ''Əl-Nəssr''in prinsipial rəqibi ''Əl-Hilal''ı çalışdırmış və 2023/24-də bu klubu çempion etmişdi.

Bu arada Ronaldo ilə bağlı ortaya maraqlı iddia atılıb. Belə ki, ünlü futbolçu yeni mövsümdə həm ''Əl-Nəssr'', həm də Portuqaliya yığmasının bəzi matçlarını buraxacaq. Bu xəbəri Səudiyyə Ərəbistanından olan jurnalist Fələh Əl-Kahtani paylaşıb. 40 yaşlı futbolçu Jezuş ilə bununla bağlı görüş keçirib və onlar Ronaldonun sağlamlığı baxımından onun nisbətən az əhəmiyyət kəsb edən oyunları buraxacağı ilə bağlı razılığa gəliblər.

Ronaldonun yaşını nəzərə aldıqda onun orqanizmi üçün artıq yükləmələr müəyyən çərçivə daxilində olmalıdı.

''Qızıl top''un beşqat qalibi ötən mövsümün sonlarına yaxın fiziki yüklənmə üzündən bəzi matçları məcburi şəkildə buraxmalı olmuşdu. Bu dəfə eyni problemi yaşamamaq üçün o, mövsüm ərzində klub və yığma səviyyəsində oyunların təxminən 25 faizini buraxmağa razılıq verib.

Ronaldo həm də DÇ-2026-ya optimal formada yollanmaq üçün mövsüm ərzində zədələrdən mümkün qədər qorunmaq istəyir.