40 yaşı olmasına baxmayaraq futboldan doymayan və ''Əl-Nəssr''də eləcə də Portuqaliya yığmasında qolları sıralamaqda davam Kriştiano Ronaldonun bu dəfə özündən yox, oğlundan yeni xəbər var.

''Qızıl top''un beşqat qalibinin 14 yaşlı oğlu Kriştiano Ronaldo dos Santos ilk dəfə Portuqaliyanın U-15 yığmasına dəvət alıb. O, hazırda ''Əl-Nəssr''in akademiyasında top qovur. Portuqaliyanın 15 yaşadək futbolçuları Vlatko Markoviçin adını daşıyan turnirdə iştirak edəcəklər.

Turnir mayın 13-18-də Xorvatiyada keçiriləcək. Portuqaliya burda Yaponiya, Yunanıstan və İngiltərə ilə qarşılaşacaq. Ronaldo 653 milyon təqibçisi olan ''instaqram'' səhifəsində Portuqaliyanın U-15 yığmasına dəvət alanların siyahısını paylaşıb və ''səninlə fəxr edirəm, oğlum'' ifadəsini yazıb. İstedadı ilə çoxdan diqqət çəkməyi bacaran Ronaldonun oğlu indiyə qədər atasının şərəfini qoruduğu klubların akademiyalarında top qovub. 2022-də atası ilə birlikdə Səudiyyə Ərəbistanınan yollanmamışdan öncə o, ''Yuventus'' və ''Mançester Yunayted''in akademiyasında çıxış etmişdi.

Kriştiano bu yaxınlarda verdiyi açıqlamada karyerasını bitirməmişdən öncə oğlu ilə birlikdə oynamaq istədiyini etiraf etmişdi. Amma vurğulamışdı ki, bu, oğlundan daha çox onun özündən asılıdı.