Tanınmış italiyalı mütəxəssis Stefano Piolinin Səudiyyə Ərəbistanında işləri heç də yaxşı getmir.

''Football-plus.az'' İtaliya mətbuatına istinadən xəbər verir ki, bu mütəxəssis tezliklə ''Əl-Nəssr''i tərk edə bilər.

Pioli tək nəticələr baxımından yox, paltardəyişmə otağına nəzarət baxımından da ciddi problemlər yaşayır. 59 yaşlı mütəxəssisin vətəninə qayıda biləcəyi ilə bağlı şayiələr yayılıb. Onun adı A seriyasının bir neçə klubu ilə yanaşı hallanır ki, bunların arasında ''Roma'' da var. Belə güman olunur ki, Klaudio Ranyeri mövsümün sonunda ''Roma''nı tərk etdikdən sonra onu əvəzləməyə əsas namizəd məhz Piolidi.

İddialara görə ''Əl-Nəssr''in nəticələri pisləşməyə başladıqdan sonra onun komandanın lideri Kriştiano Ronaldo ilə münasibətləri tədricən pozulmağa başladı. Komandada bu məşqçiyə və onun oyun sisteminə inam itib. Pioli bu vəzifəyə ötən ilin sentyabrında gəlib. 2021/22-də ''Milan''ın çempionluq həsrətinə son qoyan Pioli bu uğuru ''Əl-Nəssr''də yaşaya bilmədi. Komanda faktiki olaraq çempionluq şansını itirib.

Ər-Riyad təmsilçisi liderdən 10 xal geridə olmaqla 3-cü pillədə qərarlaşıb. Kriştiano ''Əl-Nəssr''də 71 çempionat oyununda 68 qol, ümumilikdə isə 103 rəsmi oyuna 92 qol vurmasına baxmayaraq hələ də çempionluq sevinci yaşamayıb.

40 yaşlı portuqaliyalı ulduz Səudiyyə Ərəbistanında artıq 3-cü mövsümünü tamamlamaq üzrədi.