Gələn mövsüm üçün iddiasını gizlətməyən “Neftçi” artıq üç gündü təlim-məşq toplanışının ikinci hissəsinə başlayıb.

Hazırlıq prosesi Polşada davam edir. “Ağ-qaralar”ın baş məşqçisi Samir Abasov bu arada klub telekanalına müsahibə verib.

- Bakıdakı hazırlıq prosesi başa çatdı. Polşaya gəlmişik. İkinci günü bitirdik. İlk yoxlama oyununa çıxacağıq. Birinci və ikinci oyunumuz fiziki yükləmələr altında gedəcək. Əvvəldən də belə nəzərdə tutmuşuq. Oyundan özünüz də görəcəksiz ki, güc bölgüləri tam olacaq. Bütün futbolçuları oynatmağı düşünürəm. İki məşqin ardından oyuna çıxmaq fiziki yükləmə xarakteri daşıyacaq. Növbəti iki oyuna da başqa cür hazırlaşacağıq, o haqda da sonra danışarıq. Məşqlərin ağır keçməsinə baxmayaraq, uşaqlar həddən artıq həvəslidilər. Planımız necə idisə, elə də davam edirik. Hər şey - şərait, bizə göstərilən qayğı çox yüksək səviyyədədi.

- Yeni transferlər haqda fikirləriniz? Rezabala, Varqas və İmad Polşadadı.
- Yeni transferlərimizdi, komandaya Polşada olanda qoşulublar. İmadın zədəli olduğunu bilirdik. Əvvəlki klubundan qalmış zədədi. Bir həftəni bizim – fiziki məşqçilərin və həkimlərin nəzarəti altında keçirəcək və məşqlərə qoşulacaq. Rezabala və Varqasa gəlincə, komandanı qane edir. Əlavə məşqlər də edirlər ki, komandanın balansına uyğunlaşsınlar. Yeni transferləri gətirmişik. Ümumi fiziki durumlarından danışmaq tezdi. Biz nə vaxt yığışmışıq, onlar nə vaxt gəlib. Həvəsləri, istəkləri göz qabağındadı. İnşallah, onları da çempionata hazır edə bilərik.

- İlk oyun Təl-Əviv “Hapoel”inə qarşı olacaq. Varqası, yaxud Rezabalanı start heyətində, yaxud sonradan meydana daxil olan futbolçu kimi görə bilərik?
- Çox güman, Freddi Varqası yox. Freddi iyunun 15-dən bu tərəfə nə oyun, nə də məşqlərdə olub. Fərdi məşq etsə də, yetərli deyil. Onun oynaması yersiz və riskli olar. Rezabalanı görə bilərik.

MÜZƏFFƏR QULUZADƏ