Ötən mövsüm aşağı büdcə ilə 2-ci liqada çempion olan “Şahdağ Qusar”ın növbəti mövsüm 1-ci liqada iddialılardan olacağı gözlənilirdi. Lakin qusarlıların düşərgəsində işlər yaxşı getmir.

Klubun təsisçisi və sponsorunun AZENKO olduğunu demişdik. Prezident Elçin Cananovla yolların ayrıldığı da bəlli idi.

Əldə etdiyimiz məlumata görə, hazırda klub ştatında cəmi beş nəfər var. Elçin Cananov, Elnur Abdullayev, Rahid Əmirquliyev, mühasib və sürücü. Klubda hamı sponsor şirkətdən cavab gözləyir, hər həftə yubadırlar, yayınırlar. Hələ də klubda heç nə bəlli deyil. Elçin Cananov da klubdan rəsmi şəkildə getməyib.

Böyük ehtimalla, klub başqa sponsora veriləcək. Amma başqa variantlar da var.

Belə ki, klubun təmirdə olan Şövkət Orduxanov adına Qusar şəhər stadionu Gənclər və İdman Nazirliyinin öhdəliyinə verilib. Stadionun bundan sonrakı təmir işlərini də məhz onlar edəcək. Notariusda hədiyyə kimi qeyd olunsa da, dövlət stadionu klubdan alıb, Gənclər və İdman Nazirliyinin balansına keçirib.

Çox güman, klubu başqa sponsor götürməsə, ya nazirlik, ya da nazirliyin təyin edəcəyi adamlar tərəfindən idarə ediləcək. Klubda böyük narahatlıq var. Dağılmaq ehtimalı da böyükdü.

Çempion kimi 1-ci liqaya yüksələn “Şahdağ Qusar”ın futbolçuları hardan və necə tapacağı, hansı pulla saxlayacağı bəlli deyil. Bir sözlə, vəziyyət çox qarışıqdı.

MÜZƏFFƏR QULUZADƏ